გახარიას პარტია კობახიძისგან ოკუპირებულ აფხაზეთში საწვავის შეტანაზე განმარტებას ითხოვს
საპარლამენტო ოპოზიციური პარტია „გახარია — საქართველოსთვის“ პრემიერ-მინისტრ ირაკლი კობახიძისგან ოკუპირებულ აფხაზეთში საწვავის შეტანის საკითხზე პასუხებს ითხოვს. პარტიის წევრმა, შალვა კერესელიძემ მთავრობის მეთაურს ოფიციალური სადეპუტატო კითხვით უკვე მიმართა.
ოპოზიციური გუნდი ითხოვს დეტალურ ინფორმაციას იმისა შესახებ, თუ რა სამართლებრივი საფუძვლით და პროცედურების დაცვით განხორციელდა ოკუპირებულ ტერიტორიაზე საწვავის მიწოდება. კერძოდ, პარტიას აინტერესებს საქართველოს მთავრობის მიერ გაცემული შესაბამისი თანხმობის ასლი, იმ ბიზნესსუბიექტების ჩამონათვალი, რომლებმაც ეს ოპერაცია განახორციელეს, და „ოკუპირებული ტერიტორიების შესახებ“ კანონით განსაზღვრული კონკრეტული მიზნები.
გარდა ამისა, სადეპუტატო შეკითხვაში მოთხოვნილია ზუსტი მონაცემები მიწოდებული საწვავის რაოდენობის, პერიოდისა და საბოლოო დანიშნულების შესახებ. გახარიას გუნდი ასევე ითხოვს განმარტებას, თუ რა მარშრუტითა და პროცედურებით შევიდა ტვირთი აფხაზეთში და არსებობდა თუ არა მთავრობისადმი წინასწარი ოფიციალური თხოვნა ან მომართვა.
საქართველოს მოქმედი კანონმდებლობის შესაბამისად, პრემიერ-მინისტრ ირაკლი კობახიძეს სადეპუტატო კითხვაზე საპასუხოდ 20-დღიანი ვადა აქვს.
ფორმულა
წყარო: formulanews.ge