რუსული გემის დაკავების გამო ნორვეგიის ელჩი კრემლის საგარეო უწყებაში დაიბარეს

რუსეთის საგარეო საქმეთა სამინისტრომ მოსკოვში ნორვეგიის ელჩი ჰაიდი ოლუფსენი დაიბარა და პროტესტი განუცხადა არქტიკაში, სვალბარდის არქიპელაგზე რუსული საკრუიზო გემის, „პროფესორ მოლჩანოვის“ დაკავების გამო.

ოფიციალური მოსკოვის განცხადებით, გემი, რომელსაც „არქტიკუგოლის“ თანამშრომლები, მეცნიერები და აუცილებელი მარაგები გადაჰყავდა, მურმანსკიდან ბარენცბურგის დასახლებაში გეგმურ რეისს ასრულებდა.

გემის დაკავება ნორვეგიის რაიონული სასამართლოს ბრძანებით, უკრაინული კომპანია „ნაფტოგაზის“ მოთხოვნის საფუძველზე განხორციელდა. უკრაინული მხარე 2016 წლიდან ითხოვს კომპენსაციას ყირიმში ქონების ექსპროპრიაციის გამო, რაზეც ჰააგის საარბიტრაჟო სასამართლომ რუსეთს 4.22 მილიარდი დოლარის გადახდა დააკისრა.

ნორვეგიის მთავრობის განცხადებით, აღნიშნული პროცესი „ნაფტოგაზსა“ და რუსეთს შორის არსებულ კერძო დავას წარმოადგენს და მასში ოსლო ჩართული არ არის, ხოლო კრემლი საარბიტრაჟო სასამართლოს იურისდიქციასა და თანხის გადახდის ვალდებულებას არ ცნობს.