ირაკლი ღარიბაშვილი სასამართლო პროცესს პოლიტიკურად მოტივირებულს უწოდებს

ოცნების ყოფილმა პრემიერ-მინისტრმა და თავდაცვის ყოფილმა მინისტრმა, ირაკლი ღარიბაშვილმა 19 ოქტომბერს დაწყებულ სასამართლო პროცესთან დაკავშირებით ვრცელი განცხადება ავრცელებს. ღარიბაშვილის შეფასებით, მის წინააღმდეგ მიმდინარე საქმე პოლიტიკურად მოტივირებულია და ცილისწამებაზეა აგებული, ხოლო პროცესის მსვლელობისას საზოგადოება სრულ სიმართლეს გაიგებს.

ყოფილმა პრემიერმა ხაზი გაუსვა თავდაცვის სამინისტროსა და ქვეყნის თავდაცვისუნარიანობის განმტკიცებისკენ მიმართულ ნაბიჯებს, რომლებიც მისი თანამდებობაზე ყოფნისას განხორციელდა. მან აღნიშნა, რომ ამ პერიოდში დაიგეგმა თავდაცვის ძალების გრძელვადიანი განვითარება, განახლდა სამხედრო ტექნიკა და ავიაცია, გაუმჯობესდა ინფრასტრუქტურა და სოციალური პირობები, გაიზარდა ხელფასები და გატარდა ნატოს სტანდარტებთან დაახლოების პოლიტიკა.

„„ყველაფერი საუკეთესო ჯარს!“ — ეს იყო ჩემი დევიზი, რომელსაც დავაფუძნე ჩემი ხედვა, პოლიტიკა და ყველა გადაწყვეტილება მინისტრად დანიშვნისთანავე“, — აცხადებს ღარიბაშვილი. მისი თქმით, 2023 წლის ბოლომდე აშენდა და რეაბილიტირდა 270-ზე მეტი ობიექტი, ხოლო ჯამში გარემონტდა 500-ზე მეტი ინფრასტრუქტურული ერთეული. გარდა ამისა, აშენდა „ჯარის ქალაქი“, სადაც 1000-ზე მეტ სამხედროს ბინები შეღავათიან ფასად გადაეცა, რაც საკანონმდებლო დონეზე, ახალ თავდაცვის კოდექსშიც აისახა.

ღარიბაშვილმა ყურადღება გაამახვილა ახალ თავდაცვის კოდექსზეც, რომელმაც, მისი თქმით, გააუქმა ე.წ. „გირჩის პროექტი“ და დაარეგულირა სავალდებულო სამხედრო სამსახურის რეფორმა. მან ასევე დეტალურად ისაუბრა დავით გარეჯის საკითხზე და აღნიშნა, რომ მისი ინიციატივითა და კოორდინაციით მოპოვებულ იქნა ორიგინალი რუკები, რამაც სახელმწიფოს პოზიციები მოლაპარაკებებში მნიშვნელოვნად გააძლიერა.

განცხადების დასასრულს ღარიბაშვილმა აღნიშნა, რომ მან მთელი გულით იმსახურა სამშობლოსა და ჯარის წინაშე, ხოლო მის წინააღმდეგ მიმდინარე პოლიტიკური დევნა შეურაცხყოფაა როგორც ქვეყნისთვის, ისე თავად ხელისუფლებისა და მმართველი პარტიისთვის.