კაია კალასი: ამერიკელი მომლაპარაკებლები თითქმის ორი წელია, უკრაინის კაპიტულაციისკენ უბიძგებენ
ევროკავშირის უმაღლესი წარმომადგენლის, კაია კალასის განცხადებით, ამერიკელი მომლაპარაკებლები უკვე თითქმის ორი წელია ცდილობენ, უკრაინა რუსეთის პირობების მიღებისკენ და კაპიტულაციისკენ უბიძგონ. ამის შესახებ მან სტრასბურგში, ევროპარლამენტის პლენარულ სხდომაზე განაცხადა.
„მიუხედავად იმისა, რომ ამერიკელი მომლაპარაკებლები უკვე თითქმის ორი წელია, წელიწად-ნახევარია, ცდილობენ უკრაინა კაპიტულაციისკენ უბიძგონ, რატომ არ დანებებულა უკრაინა პუტინის პირობებს? იმიტომ, რომ ევროპა უკრაინას მხარს უჭერს“, — განაცხადა კალასმა.
მისი თქმით, ევროპამ უკრაინის მხარდაჭერა უნდა გააგრძელოს, რადგან სხვა არჩევანი არ აქვს.
კალასმა ასევე გაიხსენა, რომ 2026 წლის თებერვალში ევროკავშირის საგარეო საქმეთა მინისტრებს სამშვიდობო მოლაპარაკებებში ევროპის მონაწილეობის „ნამდვილად მაქსიმალისტური გეგმა“ წარუდგინა.
„თუ რუსეთი მაქსიმალისტურ მოთხოვნებსა და პირობებს აყენებს, ჩვენც მაგიდაზე მაქსიმალისტური მოთხოვნები უნდა დავდოთ, რათა მოლაპარაკებებში ძალთა ბალანსი აღდგეს“, — აღნიშნა მან.
კალასის განცხადებით, რუსეთი, კერძოდ, დაინტერესებულია სანქციების მოხსნით, თუმცა მსგავს საკითხებზე გადაწყვეტილებების მიღება ევროპის კომპეტენციაში შედის. შესაბამისად, ევროპა სამშვიდობო მოლაპარაკებების მაგიდასთან აუცილებლად უნდა იყოს წარმოდგენილი.
„ძალიან მკაფიოდ უნდა ვთქვათ, რომ ჩვენც გვაქვს მოთხოვნები რუსეთის მიმართ. ასეთ რამეებს უფასოდ არ ვაძლევთ, რადგან საქმე მხოლოდ მშვიდობის დამყარებას არ ეხება — მნიშვნელოვანია ისიც, რომ მშვიდობა მყარი და სამართლიანი იყოს“, — განაცხადა კაია კალასმა.
ფორმულა
წყარო: formulanews.ge