საკონსტიტუციო სასამართლომ ოპოზიციის შუამდგომლობა არ დააკმაყოფილა

საკონსტიტუციო სასამართლომ პარლამენტის დროებითი საგამოძიებო კომისიის დასკვნის მტკიცებულებათა ნუსხიდან ამოღების შუამდგომლობა არ დააკმაყოფილა.

აღნიშნული შუამდგომლობა ოპოზიციური პარტიების არაკონსტიტუციურად ცნობასთან დაკავშირებული სარჩელის განხილვისას მოპასუხე ოპოზიციურმა „კოალიციამ ცვლილებებისთვის“ დააყენა.

„საკონსტიტუციო სასამართლომ ოპოზიციური პარტიების აკრძალვის საქმეში წულუკიანის საგამოძიებო კომისიის 2025 წლის 4 აგვისტოს დასკვნის საქმიდან ამორიცხვის თაობაზე ოპოზიციური პარტიების შუამდგომლობა არ დააკმაყოფილა | გადაწყვეტილება პლენუმმა ადგილზე, სათათბიროდ გასვლის გარეშე მიიღო“

პლენუმის გადაწყვეტილება საკონსტიტუციო სასამართლოს თავმჯდომარემ, რევაზ ნადარაიამ გაახმოვანა.

ასევე, საკონსტიტუციო სასამართლომ არ დააკმაყოფილა მოპასუხე მხარის ალტერნატიული შუამდგომლობა იმის შესახებ, რომ თუკი სასამართლო საგამოძიებო კომისიის დასკვნის მტკიცებულებათა ნუსხიდან ამოღების შუამდგომლობას არ დააკმაყოფილებს, დასკვნაში მოცემული მტკიცებულებები მოსარჩელე მხარემ წარმოადგინოს საკონსტიტუციო სასამართლოში.

ცნობისთვის, საკონსტიტუციო სასამართლოში პოლიტიკური პარტიების აკრძალვაზე სახელისუფლო გუნდის სარჩელის განხილვა დაიწყო. საქმეს საკონსტიტუციო სასამართლოს შვიდი მოსამართლის შემადგენლობით პლენუმი იხილავს.

საკონსტიტუციო სასამართლოში წარდგენილ სარჩელს პარლამენტის 88 დეპუტატი აწერს ხელს. მათი სარჩელის საფუძველზე სასამართლოს დღის წესრიგში ხუთი პოლიტიკური გაერთიანების არაკონსტიტუციურად ცნობის საკითხი დგას: „ერთიანობა − ნაციონალური მოძრაობა“, „კოალიცია ცვლილებისთვის - გვარამია მელია გირჩი დროა“, „ძლიერი საქართველო − ლელო, ხალხისთვის, თავისუფლებისთვის!“, „ფედერალისტური პარტია“ და პარტია „გახარია საქართველოსთვის“.