ალექსანდრე სარიშვილი: მიზანმიმართული დეზინფორმაციაა, რომ განათლების მინისტრის მიერ სოფელ არჩეულში შეძენილი მი წის ნაკვეთი არის საბავშვო ბაღის ტერიტორია, ამ ტერიტორიაზე არავითარი შენობა-ნაგებობა არ იყო განთავსებული, საბავშვო ბაღი ფუნქციონირებდა იმ ტერიტორიაზე, სადაც აშენებულია ახალი ბაღი

ბოლო დღეების განმავლობაში, სოციალურ ქსელში აქტიურად ვრცელდება მიზანმიმართული დეზინფორმაცია განათლების მინისტრის გივი მიქანაძის მიერ, ლანჩხუთის მუნიციპალიტეტში, სოფელ არჩეულში შეძენილ მიწის ნაკვეთთან დაკავშირებით, თითქოსდა კონკრეტული მიწის ნაკვეთი არის საბავშვო ბაღის ტერიტორია, რაც აბსოლუტური ტყუილი და სისულელეა - განაცხადა ლანჩხუთის მუნიციპალიტეტის მერმა ალექსანდრე სარიშვილმა.

მისი თქმით, კონკრეტულ მიწის ნაკვეთზე 90-იანი წლების შემდეგ არა თუ საბავშვო ბაღი, არამედ ამ ტერიტორიაზე არავითარი შენობა-ნაგებობა არ იყო განთავსებული.

„რაც შეეხება საბავშვო ბაღს, ამ სოფელში გასულ წელს აშენდა თანამედროვე სტანდარტებით აღჭურვილი საბავშვო ბაღი. მანამდე საბავშვო ბაღი ფუნქციონირებდა იმ ტერიტორიაზე, სადაც აშენდა ახალი ბაღი. რაც შეეხება მიწის ნაკვეთის შეძენის სისწორეს, რომელიც აბსოლუტურად ყველა პროცედურებისა და კანონმდებლობის სრული წესების დაცვით არის შეძენილი, შეუძლია ნებისმიერ მსურველს, დაინტერესებულ პირს, მიმართოს საჯარო რეესტრის ვებ-გვერდს ან eAuction.ge-ს, სადაც ნახავს ამ ინფორმაციას. ეს ყველაფერი ემსახურება დეზინფორმაციას და მოსახლეობის შეცდომაში შეყვანას“ - განაცხადა ალექსანდრე სარიშვილმა