აშშ-ის ცენტრალური სარდლობის მეთაური: ირანის შესაძლებლობა, დაემუქროს აშშ-სა და მის პარტნიორებს ახლო აღმოსავლეთში, მნიშვნელოვნად შესუსტდა

აშშ-ის ცენტრალური სარდლობის (CENTCOM) მეთაურმა, ადმირალმა ბრედ კუპერმა ხუთშაბათს კანონმდებლებს განუცხადა, რომ ბოლო ერთი წლის განმავლობაში აშშ-ისა და ისრაელის სამხედრო ოპერაციების შედეგად, ირანის შესაძლებლობა, დაემუქროს ამერიკის შეერთებულ შტატებსა და მის პარტნიორებს ახლო აღმოსავლეთში, „მნიშვნელოვნად შესუსტდა“.

ირანს აღარ შეუძლია დაემუქროს აშშ-ს ან მის რეგიონულ პარტნიორებს „ისეთი გზებით, როგორც ამას ადრე ახერხებდა“ - განაცხადა კუპერმა სენატის შეიარაღებული ძალების კომიტეტის მოსმენაზე.

კუპერმა ირანის ბირთვულ პოტენციალზეც ისაუბრა და აღნიშნა, რომ თეირანის „ბირთვული გარღვევის დრო“ გაიზარდა.

გარდა ამისა, კუპერის თქმით, ირანი აღარ აგზავნის რესურსებსა და დაფინანსებას რეგიონში თავისი „პროქსი“ ჯგუფებისთვის, მათ შორის იემენში ბაზირებული „ჰუსიტებისა“ და ლიბანური „ჰეზბოლასთვის“.