ატომური ენერგიის საერთაშორისო სააგენტოს მმართველთა საბჭომ მიიღო აშშ-ის მიერ მხარდაჭერილი რეზოლუცია, რომელიც ირანს მოუწოდებს, წარმოადგინოს ინფორმაცია გამდიდრებული ურანის დარჩენილი მარაგების შესახებ

ატომური ენერგიის საერთაშორისო სააგენტოს მმართველთა საბჭომ მიიღო აშშ-ის მიერ მხარდაჭერილი რეზოლუცია, რომელიც ირანს მოუწოდებს, წარმოადგინოს ინფორმაცია გამდიდრებული ურანის დარჩენილი მარაგების შესახებ და ინსპექტორებს მათი შემოწმების უფლება მისცეს. ინფორმაციას ამის შესახებ სააგენტო Reuters-ი ავრცელებს.

გასული წლის ივნისში ისრაელისა და აშშ-ის თავდასხმებმა გაანადგურა ან სერიოზულად დააზიანა ირანის ურანის გამდიდრების ქარხნები, თუმცა მიიჩნევა, რომ მათ მიერ წარმოებული გამდიდრებული ურანის დიდი ნაწილი - მათ შორის იარაღისთვის გამოსაყენებელ დონესთან მიახლოებული მასალა - გადარჩა.

ირანს ჯერ კიდევ არ უცნობებია ატომური ენერგიის საერთაშორისო სააგენტოსთვის (IAEA) ამ მასალის ბედი და არც სააგენტოს ინსპექტორები დაუშვია დაბომბილ ობიექტებზე შესამოწმებლად. რეზოლუციის მიღებას სათავეში აშშ ჩაუდგა, თუმცა ირანმა ამას „სამხედრო აგრესიის გათეთრება“ უწოდა, ვინაიდან ინსპექტორებს დარტყმებამდე ობიექტებზე წვდომა ჰქონდათ.