ავტოსაგზაო შემთხვევისას გარდაცვლილის მამა: დაიჭირეს უდანაშაულო ადამიანი, დამნაშავეს ხელი დააფარეს დიდი ფულის სანაცვლოდ. მეუბნებოდნენ, რა მნიშვნელობა აქვს შენთვის, ხომ ვიჭერთო?!
გენერალური პროკურატურის სამართალწარმოების პროცესში ჩადენილი დანაშაულის გამოძიების დეპარტამენტმა მსჯავრდებულ გრიგოლ ვარდოსანიძის მიმართ გამოტანილი გამამტყუნებელი განაჩენის გადასინჯვის გადაწყვეტილება მიიღო.
უწყების ცნობით, ხელახალი გამოძიების პროცესში დაიკითხნენ ახალი მოწმეები, ჩატარდა ათეულობით საგამოძიებო და საპროცესო მოქმედება, მათ შორის შესაბამისი ექსპერტიზები, შეისწავლეს საგამოძიებო და სასამართლო საქმის მასალები.
ხელახალი გამოძიებისას მოპოვებული მტკიცებულებების ერთობლიობამ გამორიცხა გრიგოლ ვარდოსანიძის მიერ რაიმე სახის დანაშაულის ჩადენის ფაქტი.
გრიგოლ ვარდოსანიძეს 2008 წელს ბრალი დაედო ტრანსპორტის მოძრაობის უსაფრთხოებისა და ექსპლუატაციის წესების დარღვევაში, რამაც გამოიწვია ერთი ადამიანის გარდაცვალება და 2009 წელს 6 წლით თავისუფლების აღკვეთა მიესაჯა.
სააპელაციო სასამართლოში, მოწმის სახით, გარდაცვლილის მამა დაიკითხა, რომელმაც წინა ხელისუფლება საქმის მასალების გაყალბებასა და არაობიექტურ გამოძიებაში დაადანაშაულა.
„პროკურატურამ დანაშაული დაინახა და აღძრა საქმე, ვინც ეს დანაშაული ჩაიდინა. დაიჭირეს უდანაშაულო ადამიანი, დამნაშავეს ხელი დააფარეს დიდი ფულის სანაცვლოდ. მეუბნებოდნენ, რა მნიშვნელობა აქვს შენთვის, ხომ ვიჭერთო?! დამნაშავე უნდა დაიჭირო და არა უდანაშაულო ადამიანი “, - განაცხადა გარდაცვლილი გიორგი დარბაიძის მამამ, მერაბ დარბაიძემ „ქრონიკასთან“.
