AXIOS: აშშ და ირანი ომის დასასრულებლად ერთგვერდიანი მემორანდუმის გაფორმებასთან ახლოს არიან

თეთრ სახლში ფიქრობენ, რომ ისინი ირანთან ერთგვერდიანი მემორანდუმის გაფორმებასთან ახლოს არიან, რაც ომის დასრულებასა და დეტალურ ბირთვულ მოლაპარაკებებს საფუძვლად დაედება. ინფორმაციას AXIOS-ი ოთხ სხვადასხვა წყაროზე დაყრდნობით ავრცელებს.

გამოცემის ცნობით, აშშ უახლოეს 48 საათში რამდენიმე საკვანძო პუნქტთან დაკავშირებით ირანის პასუხს ელოდება. ჯერ არაფერია შეთანხმებული, მაგრამ, როგორც წყაროებმა გამოცემას განუცხადებს, ომის დაწყებიდან მხარეები შეთანხმებასთან ასე ახლოს არასდროს ყოფილან.

AXIOS-ის ინფორმაციით, გარიგება გულისხმობს ირანის მიერ ურანის გამდიდრებაზე მორატორიუმის გამოცხადებას, აშშ-ის თანხმობას თეირანის წინააღმდეგ დაწესებული სანქციების მოხსნაზე, ირანის კუთვნილი მილიარდობით გაყინული დოლარის განბლოკვასა და ორივე მხარის მიერ ჰორმუზის სრუტის ბლოკადის მოხსნას.

ამასთან ერთად, თეთრ სახლში ფიქრობენ, რომ ირანის ხელმძღვანელობა დაქსაქსულია და სხვადასხვა მმართველ რგოლთან კონსენსუსის მიღწევა რთულია. ზოგი ამერიკელი ჩინოვნიკი შეთანხმების დადებას სკეპტიკურად უყურებს.

თუმცა, ორი ამერიკელი ჩინოვნიკის განცხადებით, აშშ-ის პრეზიდენტის, დონალდ ტრამპის გადაწყვეტილება ჰორმუზის სრუტეში კომერციული გემების გაცილების ოპერაციის გადადებასთან დაკავშირებით, რაც მყიფე ზავს დაარღვევდა, მოლაპარაკებებში მიღწეულ პროგრესს უკავშირდება.

როგორც AXIOS-ი წერს, მემორანდუმი, რომელიც 14 პუნქტისგან შედგება, განხილვის სტადიაშია. განხილვებში ტრამპის სპეციალური წარმომადგენლები, სტივ უიტკოფი და ჯარედ კუშნერი ირანელ ოფიციალურ პირებთან ერთად როგორც პირდაპირ, ისე შუამავლების მეშვეობით მონაწილეობენ.

პროექტის თანახმად, ურთიერთგაგების მემორანდუმი რეგიონში ომის დასრულების გამოცხადებას და 30-დღიანი მოლაპარაკებების დაწყებას გულისხმობს, რომლის მთავარი მიზანი ჰორმუზის სრუტის გახსნა, ირანის მიერ ბირთვულ პროგრამაზე უარის თქმა და აშშ-ის სანქციების მოხსნაა.