AXIOS: ტრამპს ირანის წინააღმდეგ სამხედრო მოქმედებების შესაძლო ვარიანტები გააცნეს

აშშ-ის პრეზიდენტმა დონალდ ტრამპმა თეთრ სახლში ირანთან დაკავშირებით თათბირი გამართა, რომლის დროსაც მას სამხედრო მოქმედებების განახლების შესაძლო ვარიანტები გააცნეს. ინფორმაციას AXIOS-ი ავრცელებს.

გამოცემის ცნობით, თათბირი მას შემდეგ გაიმართა, რაც ტრამპმა ირანზე თავდასხმის გადადების შესახებ განცხადება გააკეთა.

აშშ-ის ლიდერი აგრძელებს იმის მტკიცებას, რომ ირანს დიპლომატიური გარღვევისთვის რამდენიმე დღე აქვს დარჩენილი, - წერს გამოცემა.

ამერიკელი ჩინოვნიკები აცხადებენ, რომ ტრამპს სინამდვილეში ირანზე თავდასხმის გადაწყვეტილება მიღებული არ ჰქონდა. თუმცა, როგორც წყაროები გამოცემას უყვებიან, თეთრი სახლის ლიდერის გადაწყვეტილება ირანზე დარტყმების გადადების შესახებ განპირობებული იყო სპარსეთის ყურის ქვეყნების ლიდერების თხოვნით, რომლებსაც საკუთარი სანავთობო ინფრასტურქტურის უსაფრთხოება ადარდებს.

AXIOS-ის ინფორმაციით, თეთრ სახლში გამართულ შეხვედრას ესწრებოდნენ აშშ-ის ვიცე-პრეზიდენტი ჯეი დი ვენსი, სახელმწიფო მდივანი მარკო რუბიო, ტრამპის სპეცწარმომადგენელი სტივ უიტკოფი, თავდაცვის მდივანი პიტ ჰეგსეტი, შეიარაღებული ძალების მეთაურთა გაერთიანებული კომიტეტის ხელმძღვანელი, გენერალი დენ კეინი, ცენტრალური სადაზვერვო სააგენტოს (CIA) დირექტორი ჯონ რეტკლიფი.