აზერბაიჯანის საგარეო საქმეთა სამინისტრომ ევროპარლამენტის მიერ მიღებული რეზოლუციის გამო ევროკავშირის ელჩს ბაქოში საპროტესტო ნოტა გადასცა

აზერბაიჯანის საგარეო საქმეთა სამინისტროში ევროკავშირის ელჩი, მარიანა კუიუნჯიჩი დაიბარეს და საპროტესტო ნოტა გადასცეს. ინფორმაციას აზერბაიჯანული მედია ავრცელებს.

მედიის თანახმად, ოფიციალური ბაქოს უკმაყოფილება გამოწვეულია 30 აპრილს ევროპარლამენტის მიერ მიღებული რეზოლუციით. აზერბაიჯანში აღნიშნულ რეზოლუციას მიკერძოებული და დაუსაბუთებელი უწოდეს.

„აღინიშნა, რომ რეზოლუციაში ჩაწერილი დებულებები რეალობას არ ასახავს, ობიექტურობის პრინციპებს არღვევს და აგრეთვე ეწინააღმდეგება ვალდებულებებს სახელმწიფოს სუვერენიტეტისა და ტერიტორიული მთლიანობის პატივისცემის კუთხით“, - აღნიშნულია აზერბაიჯანის საგარეო საქმეთა სამინისტროს განცხადებაში.

ცნობისთვის, ცოტა ხანის წინ აზერბაიჯანის პარლამენტმა მიიღო დადგენილება, რომლის თანახმადაც ევროპარლამენტთან ურთიერთობას აჩერებს. აღნიშნული გადაწყვეტილება ევროპარლამენტის ანტიაზერბაიჯანული საქმიანობის გამო მიიღეს.