Bloomberg: ზელენსკიმ უარყო ევროკავშირში უკრაინის ნაწილობრივი წევრობის იდეა

უკრაინის პრეზიდენტმა, ვოლოდიმირ ზელენსკიმ უარყო გერმანიის კანცლერის, ფრიდრიხ მერცის იდეა ევროკავშირში უკრაინის ნაწილობრივი წევრობის შესახებ და განაცხადა, რომ მისი ქვეყანა ბლოკის სრულუფლებიან წევრობას იმსახურებს. ინფორმაციას ამის შესახებ გამოცემა Bloomberg-ი ავრცელებს.

„ჩვენ არასდროს განვიხილავდით წევრობას, როგორც გაწევრიანებას რაღაც „ნახევარ-კავშირში“, - დაწერა ზელენსკიმ წერილში, რომელიც ევროპული საბჭოს პრეზიდენტს, ანტონიუ კოშტას, ევროკომისიის პრეზიდენტს, ურსულა ფონ დერ ლაიენსა და კვიპროსის პრეზიდენტს, ნიკოს ქრისტოდულიდისს გაეგზავნათ.

გამოცემა აღნიშნავს, რომ ზელენსკის გერმანიის ლიდერი სახელით არ უხსენებია, თუმცა თავის წერილში მან არაერთხელ უარყო „ნაწილობრივი გადაწყვეტილებები“ და გააფრთხილა, რომ ბლოკის გაფართოებასთან დაკავშირებული მერყეობა რუსეთის მიერ აღქმული იქნება, როგორც სისუსტე.

თავის წერილში უკრაინის პრეზიდენტმა ხაზგასმით აღნიშნა, რომ მოსკოვი კიევის ევროპისგან მოწყვეტას ცდილობს.

გამოცემამ ასევე დასძინა, რომ წერილში ზელენსკიმ აღნიშნა, რომ უკრაინა წარმოადგენს სამხედრო აქტივს, რომელსაც შეუძლია ხელი შეუწყოს ევროპული უსაფრთხოების უზრუნველყოფას. პრეზიდენტმა ხაზგასმით აღნიშნა, რომ უკრაინა მხოლოდ მხარდაჭერას კი არ იღებს, არამედ საკუთარი წვლილიც შეაქვს ევროპის თავდაცვაში.

გარდა ამისა, პრეზიდენტმა წერილში დასძინა, რომ ბლოკში გაწევრიანების მსურველ არცერთ სხვა ქვეყანას არასდროს განუცდია მსგავსი ზეწოლა, ვინაიდან უკრაინისგან წევრობისთვის აუცილებელი ეკონომიკური და სამართლებრივი რეფორმების გატარებას იმ დროს მოითხოვენ, როდესაც ის მეორე მსოფლიო ომის შემდეგ ევროპაში ყველაზე მასშტაბურ ომში იბრძვის.