CNN: აშშ-ის სადაზვერვო ავიაციამ კუბის სანაპიროებთან აქტივობა მკვეთრად გაზარდა. მსგავსი რამ ვენესუელასა და ირანში დაწყებული ოპერაციების წინ შეინიშნებოდა

კუბის სანაპიროებთან აშშ-ის სადაზვერვო ფრენები მკვეთრად გახშირდა, - წერს CNN-ი ღია საავიაციო მონაცემების საკუთარ ანალიზზე დაყრდნობით.

4 თებერვლიდან მოყოლებული, აშშ-ის სამხედრო-საზღვაო და სამხედრო-საჰაერო ძალებმა სულ მცირე 25 ასეთი გაფრენა განახორციელეს. CNN-ი აღნიშნავს, რომ თებერვლამდე ამ რაიონში მსგავსი აქტივობა თითქმის არ ფიქსირდებოდა.

ფრენების უმეტესობა კუბის 2 უდიდესი ქალაქის - ჰავანისა და სანტიაგო-დე-კუბას მახლობლად სრულდებოდა. ფრენების ძირითად ნაწილს მეთვალყურეობისა და დაზვერვისთვის განკუთვნილი საპატრულო თვითმფრინავები, P-8A Poseidon-ები ახორციელებდნენ. ასევე გამოიყენებოდა რადიოელექტრონულ დაზვერვაზე სპეციალიზებული RC-135V Rivet Joint-ები და რამდენიმე სადაზვერვო უპილოტო საფრენი აპარატი MQ-4C Triton.

პენტაგონმა კომენტარის გაკეთებაზე უარი განაცხადა.

CNN-ი აღნიშნავს, რომ მსგავსი სიტუაციები, როდესაც ტრამპის ადმინისტრაციის მხრიდან რიტორიკის გამკაცრებას თან სდევდა სადაზვერვო ფრენების რაოდენობის ზრდა, წინ უძღოდა ვენესუელის პრეზიდენტის, ნიკოლას მადუროს დაკავებას 2026 წლის იანვრის დასაწყისში და აშშ-ის ოპერაციის დაწყებას ირანში თებერვალში.