CNN: ირანი სამხედრო მრეწველობას მოსალოდნელზე სწრაფად აღადგენს და დრონების წარმოებაც დაიწყო

ირანმა აპრილში გამოცხადებული ექვსკვირიანი ზავის განმავლობაში უპილოტო საფრენი აპარატების წარმოება ნაწილობრივ აღადგინა, რაც მისი სამხედრო შესაძლებლობების აღდგენის ერთ-ერთი ნიშანია. ინფორმაციას CNN-ი ამერიკულ დაზვერვაზე დაყრდნობით ავრცელებს.

როგორც ტელეარხი იუწყება, ამერიკული დაზვერვა ფიქრობს, რომ ირანი სამხედრო მრეწველობას მოსალოდნელზე სწრაფად აღადგენს.

სამხედრო პოტენციალის აღდგენა, კონფლიქტის დროს განადგურებული სარაკეტო კომპლექსების ჩანაცვლების ჩათვლით, მიუთითებს იმაზე, რომ ირანი რეგიონული მოკავშირეებისთვის სერიოზულ საფრთხედ რჩება, თუ აშშ-ის პრეზიდენტი დონალდ ტრამპი მის დაბომბვას კვლავ დაიწყებს.

აღნიშნული ცნობები აგრეთვე ეჭვქვეშ აყენებს გავრცელებულ ინფორმაციას, რომ აშშ-ისრაელის თავდასხმამ ირანული არმია გრძელვადიან პერსპექტივაში დაასუსტა.

მიუხედავად იმისა, რომ სხვადასხვა სამხედრო კომპონენტების აღდგენის განსხვავებული ვადები სახელდება, ამერიკული დაზვერვა ვარაუდობს, რომ ირანი უპილოტო საფრენი აპარატებით იერიშების მიყენების პოტენციალს ექვს თვეში მთლიანად აღადგენს.