CNN: ისრაელი შეშფოთებულია, რომ ტრამპი ირანთან ცუდ შეთანხმებას დადებს

ისრაელი შეშფოთებულია იმის გამო, რომ აშშ-ის პრეზიდენტმა, დონალდ ტრამპმა ირანთან შესაძლოა მანამდე გააფორმოს შეთანხმება, ვიდრე იმ ძირითად საკითხებს გადაჭრის, რამაც თავდაპირველად ეს ორი ქვეყანა ომამდე მიიყვანა - ამის შესახებ CNN-ს ისრაელის რამდენიმე წყარომ განუცხადა.

წყაროების თქმით, შეთანხმება, რომელიც თეირანის ბირთვულ პროგრამას ნაწილობრივ ხელუხლებელს დატოვებს და გვერდს აუვლის ისეთ თემებს, როგორიცაა ბალისტიკური რაკეტები და რეგიონული „პროქსი“ დაჯგუფებების მხარდაჭერა, აიძულებს ისრაელს, რომ ომი დაუსრულებლად მიიჩნიოს.

ომის ადრეულ ეტაპზე ტრამპმა მიანიშნა, რომ აშშ-ს სურდა ირანის ბალისტიკური რაკეტების პროგრამის განადგურება, რეგიონული დაჯგუფებების მხარდაჭერის შეწყვეტა და ბირთვული ობიექტების დახურვა, რათა ქვეყანამ ვერასოდეს შეძლოს ბომბის შექმნა.

თუმცა, 10 კვირის შემდეგ, მოლაპარაკებები ფოკუსირებულია ურანზე - კერძოდ, მის გამდიდრებაზე იარაღისთვის საჭირო დონემდე - და ჰორმუზის სრუტის გახსნაზე.

დისკუსიებში ჩახედულმა ერთ-ერთმა წყარომ აღნიშნა, რომ ისრაელს ესმის, რომ რაკეტების და „პროქსი“ დაჯგუფებების საკითხი „სავარაუდოდ დღის წესრიგიდან ამოღებულია“. სწორედ ამიტომ ანიჭებს პრემიერ-მინისტრი ნეთანიაჰუ პრიორიტეტს ურანს, როგორც ყველაზე დაუყოვნებელ საფრთხეს.

„არსებობს რეალური შეშფოთება, რომ ტრამპი ცუდ შეთანხმებას დადებს“, - განუცხადა CNN-ს ისრაელის კიდევ ერთმა ოფიციალურმა პირმა.

ისრაელის მაღალჩინოსნის თქმით, ქვეყანა კვლავ მზადყოფნაშია მოლაპარაკებების ჩაშლის შემთხვევისთვის. „ჩვენ მოხარულები ვიქნებით, თუ შეთანხმება არ შედგება, მოხარულები ვიქნებით, თუ ჰორმუზის ალყა გაგრძელდება და მოხარულები ვიქნებით, თუ ირანი კიდევ რამდენიმე დარტყმას მიიღებს“, - თქვა მან და იქვე აღიარა, რომ საბოლოო გადაწყვეტილება ტრამპზეა.

მან ასევე აღნიშნა, რომ ესკალაცია რეალური სცენარია, „თუ ირანელები თამაშს და მოლაპარაკებების გაჭიანურებას გააგრძელებენ“.