CNN: ტრამპი ირანის ახალ სამშვიდობო წინადადებას სკეპტიკურად უყურებს

აშშ-ის პრეზიდენტმა დონალდ ტრამპმა მიანიშნა, რომ ირანის წინადადებას, ომის დასრულების შესახებ, სავარაუდოდ, არ მიიღებს. ინფორმაციას CNN-ი ავრცელებს.

როგორც ამერიკული ტელეარხი აღნიშნავს, თეირანმა ვაშინგტონს შესთავაზა გეგმა, რომელიც ჰორმუზის სრუტის გახსნას და ბირთვული მოლაპარაკებების გადადებას გულისხმობს.

CNN-ს ორმა წყარომ განუცხადა, რომ ტრამპმა საკუთარი აზრი ირანის საკითხთან დაკავშირებით ეროვნული უსაფრთხოების მრჩევლებთან გამართულ შეხვედრაზე გამოთქვა.

ერთ-ერთი წყაროს თქმით, სრუტის გახსნა ირანის მიერ ურანის გამდიდრებისა და მარაგების შენახვის საკითხის გადაწყვეტის გარეშე აშშ-ს ზეწოლის საკვანძო ბერკეტის გარეშე დატოვებს.

თუმცა ბლოკადის გაგრძელება ენერგომატარებლებზე მაღალ ფასებს გამოიწვევს, რაც, თავის მხრივ, აშშ-ში ბენზინზე ფასების მკვეთრი მატების მიზეზია.