დავით მათიკაშვილი: ის რთული ვითარება, რომელიც ევრობიუროკრატიამ თვითონ შექმნა საქართველოსთან მიმართებით, არის მარტივი განსამუხტი, ამას სჭირდება ობიექტური მიდგომა მათი მხრიდან. საქართველო პატარა ქვეყანაა, ჩვენ ვართ ღია და გახსნილი ურთიერთობებისთვის, ჩვენ გვინდა სამართლიანი მიდგომები და ობიექტური დამოკიდებულება

ჩვენ როდესაც კონსტიტუციურ რეფორმას ვახორციელებდით და 78-ე მუხლს ვწერდით, ნამდვილად ვერ წარმოვიდგენდით, რომ არაობიექტურობის ეს მორევი იქნებოდა ჩვენს წინააღმდეგ მომართული ევრობიუროკრატიიდან. ეს ყველაფერი ევროსკეპტიციზმს ძალიან აღრმავებს ჩვენს საზოგადოებაში, - განაცხადა გადაცემაში „EURO ანატომია“ საპროცედურო საკითხთა და წესების საპარლამენტო კომიტეტის თავმჯდომარე დავით მათიკაშვილმა.

მისივე თქმით, ქართველი ადამიანისთვის ყველაზე რთეულად გადასატანი უსამართლობა და არაობიექტურობაა.

„როდესაც საზოგადოება თვითონ, საკუთარი თვალით ხედავს განვითარებულ მოვლებს, ჩართავს ტელევიზორს და ბრიუსელიდან და ევროკავშირის სხვადასხვა დედაქალაქიდან აბსოლუტურად განსხვავებული რეცენზიები ისმის საქართველოსთან მიმართებით, ეს ანგრევს იმ ევროპულ მიმართულებას და მისწრაფებებს, რაც ქართულ საზოგადოებაში იყო.

ის რთული ვითარება, რომელიც ევრობიუროკრატიამ თვითონ შექმნა საქართველოსთან მიმართებით, არის მარტივი განსამუხტი, ამას სჭირდება ობიექტური მიდგომა მათი მხრიდან. საქართველო პატარა ქვეყანაა, ჩვენ ვართ ღია და გახსნილი ურთიერთობებისთვის, ჩვენ გვინდა სამართლიანი მიდგომები და ობიექტური დამოკიდებულება. იმ ოდიოზური სახეებიდან გამომდინარე, ვინც დღეს მართავს ევროკავშირს, ამ ეტაპისთვის ცოტა საეჭვოდ მიმაჩნია რაიმეს გამოსწორება, თუმცა ჩვენ იმედიანად ვიყოთ და მომავალ პერსპექტივაში ვიფიქროთ, რომ იქაც შეიცვლება ვითარება“, - აღნიშნა დავით მათიკაშვილმა.