დავით მათიკაშვილი: კოპენჰაგენში მშვიდობიან მომიტინგეებს ხელკეტებით უმოწყალოდ უსწორდებიან, ძაღლებს უქსევენ და ამაზე რეაგირება არავის აქვს, არავინ ხმას არ იღებს არც ევრო სტრუქტურებიდან, არც სხვა ქვეყნებიდან. დანია და ევროკავშირი კი ჩვენკენ თითს იშვერენ და ამბობენ, რომ თქვენთან ადამიანის უფლებები ირღვევაო
კარგად გვახსოვს რა ხდებოდა 2024 წლის ზამთარში რუსთაველზე, ყველა ძალადობრივი საშუალება გამოიყენეს მომიტინგეებმა იმისთვის, რომ პარლამენტის შენობა აეღოთ, პოლიციელებს ცოცხლად წვავდნენ, ახდენდნენ ყოველგვარ უმსგავსობას, თუ რამე შეიძლება ძალადობრივად გამოეყენებინათ, - განაცხადა გადაცემაში „დღის ქრონიკა“ პარლამენტის საპროცედურო საკითხთა და წესების კომიტეტის თავმჯდომარემ დავით მათიკაშვილმა.
მისივე თქმით, ამ ყველაფერს რა თქმა უნდა პოლიცია დაუპირისპირდა, იყო სამწუხარო ექსცესებიც, მაგრამ სახელმწიფომ ადეკვატური პასუხი გასცა - ახლახან ბრალი წარუდგინეს რამდენიმე სპეცრაზმელს.
„ამ დროს კოპენჰაგენში მშვიდობიან მომიტინგეებს ხელკეტებით უმოწყალოდ უსწორდებიან, ძაღლებს უქსევენ და ამაზე რეაგირება არავის აქვს, არავინ ხმას არ იღებს, არც ევრო სტრუქტურებიდან, არც სხვა ქვეყნებიდან. დანია და ევროკავშირი კი ჩვენკენ თითს იშვერენ და ამბობენ, რომ თქვენთან ადამიანის უფლებები ირღვევაო.
თურმე პოლიცია უნდა დასხდეს, თავი უნდა დაიწვას, როდესაც ესვრიან მოლოტოვის კოქტეილს, ხმა არავინ უნდა ამოიღოს, პარლამენტის შენობა უნდა დაუთმონ იმისთვის, რომ გადაწვან, პრეზიდენტის სასახლე უნდა ჩააბარონ და ეს ყველაფერი იქნება დემოკრატია. ორმაგ უსამართლო პოლიტიკაზე უარი თქვას ევროკავშირმა და ჩვენ მზად ვართ ნებისმიერ შემთხვევაში, ნებისმიერ ინსტანციაზე განვაახლოთ ურთიერთობა“, - აღნიშნა დავით მათიკაშვილმა.
იმედი
წყარო: imedinews.ge