Deutsche Welle: ევროკავშირის სასამართლომ დააკმაყოფილა რუსი ბიზნესმენის, მიხეილ გუცერიევის სარჩელი და გააუქმა მასზე დაწესებული სანქციები, რომლებიც ლუკაშენკოს რეჟიმის მხარდაჭერისთვის ჰქონდა შეფარდებული

ევროკავშირის სასამართლომ დააკმაყოფილა რუსი ბიზნესმენის, მიხეილ გუცერიევის სარჩელი და გააუქმა მასზე დაწესებული სანქციები, რომლებიც ბელარუსის პრეზიდენტის, ალექსანდრე ლუკაშენკოს რეჟიმის მხარდაჭერისთვის ჰქონდა შეფარდებული. ინფორმაციას ამის შესახებ გერმანული გამოცემა Deutsche Welle ავრცელებს.

სასამართლოს გადაწყვეტილების მიხედვით, ევროკავშირის საბჭომ ვერ წარმოადგინა საკმარისი მტკიცებულებები იმის დასასაბუთებლად, რომ სანქციების გახანგრძლივების მომენტისთვის ბიზნესმენი კვლავ იღებდა სარგებელს ლუკაშენკოს რეჟიმისგან ან ეწეოდა მის მხარდაჭერას.

მიხეილ გუცერიევი ცნობილი რუსი მეწარმე და მილიარდერია, რომლის ქონებას Forbes-ი 7.7 მილიარდ დოლარად აფასებს.

იგი არის სამრეწველო-ფინანსური ჯგუფის, „საფმარის“ დამფუძნებელი და ძირითადი მფლობელი. აღნიშნულ ჰოლდინგში შედის ისეთი მსხვილი აქტივები, როგორიცაა ნავთობკომპანია „რუსნეფტი“, რითეილერები „მ.ვიდეო“ და „ელდორადო“, ასევე რადიოსადგურები „შანსონი“ და „დაჩა“.