დმიტრი პესკოვმა უკრაინის საკითხზე „სამშვიდობო პროცესის“ განახლებისა და აშშ-ის დახმარების იმედი გამოთქვა

რუსეთი იმედოვნებს, რომ უკრაინის წინააღმდეგ მისი ომის დასასრულებლად სამშვიდობო მოლაპარაკებები განახლდება და ამაში აშშ დაეხმარება. ამ თემაზე ჟურნალისტებთან რუსეთის პრეზიდენტის პრესმდივანმა ისაუბრა. დმიტრი პესკოვმა აღნიშნა, რომ სამშვიდობო პროცესი ამჟამად „პაუზაზეა“.

„ჩვენ იმედი გვაქვს, რომ ის მაინც განახლდება. ასევე ვიმედოვნებთ, რომ ჩვენი ამერიკელი კოლეგები ამ მიმართულებით გააგრძელებენ სამშვიდობო და შუამავლურ ძალისხმევას“, - თქვა პესკოვმა.

მანამდე უკრაინის პრეზიდენტმა ვოლოდიმირ ზელენსკიმ განაცხადა, რომ დიპლომატიური ძალისხმევის გააქტიურების იმედი აქვს.

რუსეთ-უკრაინის ომზე მოლაპარაკებების პროცესი პრაქტიკულად შეჩერდა მას შემდეგ, რაც თებერვლის ბოლოს აშშ-მ და ისრაელმა ირანის წინააღმდეგ ომი დაიწყეს. აპრილის ბოლოს ზელენსკიმ განაცხადა, რომ უკრაინა მზად არის რუსეთთან სამშვიდობო მოლაპარაკებების მორიგი რაუნდისთვის სამმხრივ ფორმატში.