ესტონეთის პრეზიდენტი აცხადებს, რომ ევროპის ქვეყნებმა უკვე ახლა უნდა დაგეგმონ თავიანთი მოქმედებები იმ პერიოდისთვის, როდესაც რუსეთ-უკრაინის ომი დასრულდება, ასევე რუსეთთან ურთიერთქმედების მოდელი

ესტონეთის პრეზიდენტი, ალარ კარისი მიიჩნევს, რომ ევროპის ქვეყნებმა უკვე ახლა უნდა დაგეგმონ თავიანთი მოქმედებები იმ პერიოდისთვის, როდესაც რუსეთ-უკრაინის ომი დასრულდება, ასევე რუსეთის ფედერაციასთან ურთიერთქმედების მოდელი, რადგან ეს შესაძლოა სწრაფად და მოულოდნელად მოხდეს. ინფორმაციას ამის შესახებ უკრაინული მედია ავრცელებს.

კარისმა აღნიშნა, რომ რუსეთ-უკრაინის ომი შესაძლოა მოულოდნელად დასრულდეს და ევროპას წინასწარ უნდა ჰქონდეს მომზადებული სამოქმედო გეგმა.

„მზად ვართ თუ არა სცენარისთვის, რომ ომი დღეს ან ხვალ დასრულდეს? როგორ ვრეაგირებთ მაშინ? რა უნდა გავაკეთოთ? და რა უნდა გააკეთოს რუსეთმა? მომზადება უკვე ახლავე უნდა მიმდინარეობდეს“, - მიიჩნევს ესტონეთის პრეზიდენტი.

„ჩვენ წვლილი შევიტანეთ უკრაინის მხარდაჭერაში, მათ შორის ესტონეთმა და ფინეთმაც. ჩვენ უნდა გვქონდეს შესაძლებლობა, ვთქვათ ის, რაც სათქმელია. ეს კი მხოლოდ მაშინ არის შესაძლებელი, თუ არსებობს დიალოგი“, - აღნიშნა მან, რაც გულისხმობდა ომის შემდგომ ურთიერთქმედებას მოსკოვთან და ამისთვის მზადებას.

ასევე, პრეზიდენტმა გამოთქვა მოსაზრება, რომ საუბრები იმის შესახებ, თითქოს ესტონეთი შესაძლოა რუსული აგრესიის შემდეგი სამიზნე გახდეს, იკვებება მათ მიერ, ვისაც ქვეყნისთვის ზიანის მიყენება სურს.