ევროპარლამენტართა ნაწილმა შექმნილი ენერგოკრიზისის შედეგად გაზრდილ ფასებზე პასუხისმგებლობა ევროკავშირის ხელმძღვანელობას დააკისრა

ევროპარლამენტართა ნაწილმა ახლო აღმოსავლეთში მიმდინარე ომის ფონზე შექმნილი ენერგოკრიზისის შედეგად გაზრდილ ფასებზე პასუხისმგებლობა ევროკავშირის ხელმძღვანელობას დააკისრა.

აღნიშნულ საკითზე გამართულ დებატებზე „პატრიოტები ევროპისთვის“ ჯგუფის ევროდეპუტატმა, ჩაბა დომოტორმა აღნიშნა, რომ ევროპის ლიდერთა კატასტროფული კრახის საფასურს დღეს ევროპელი ოჯახები იხდიან.

„ახლო აღმოსავლეთში ომმა ევროპას ეკონომიკური კუთხით კვლავ ყველაზე ძლიერად დაარტყა, განსაკუთრებით ენერგომომარაგებაზე. შედეგები კი მძიმეა. 1,5 თვეში ევროპაში იმპორტირებული ენერგიის გადასახადი 24 მილიარდი ევროთი გაიზარდა, რაც ოთხსულიანი ოჯახისთვის დამატებით 210 ევროს ოდენობის ხარჯს წარმოადგენს. ნედლი ნავთობის ფასი 54%-ით გაიზარდა, ბუნებრივი აირის - 43%-ით, დიზელის კი - 26%-ით. ეს არის ლიდერთა მიერ მიღებული გადაწყვეტილებების შედეგი. ახლა საკითხავი ის კი არა არის, თუ რამდენ ხანს გაგრძელდება ფასის ზრდა, არამედ ის, საკმარისი იქნება, თუ არა ევროპაში არსებული ენერგორესურსები“, - განაცხადა ევროდეპუტატმა.