Google Maps-მა ტრამპის გადაწყვეტილების შემდეგ ამერიკელი მომხმარებლებისთვის ონტარიოს ტბას სახელი შეუცვალა და მას ამერიკის ტბა დაარქვა

Google Maps-მა ამერიკელი მომხმარებლებისთვის ონტარიოს ტბის სახელწოდება ამერიკის ტბით შეცვალა და ამით აშშ-ის პრეზიდენტის დონალდ ტრამპის აღმასრულებელი ბრძანების მოთხოვნები შეასრულა. ინფორმაციას Reuters-ი ავრცელებს.

ტრამპმა გასულ ხუთშაბათს განაცხადა, რომ დიდი ტბების ხუთეულში ყველაზე პატარა ტბას სახელწოდებას უცვლიდა. გადაწყვეტილება კანადასთან მზარდი სავაჭრო დაპირისპირების ფონზე მიიღო, რის შედეგადაც ორივე ქვეყანამ ერთმანეთს მილიარდობით დოლარის ღირებულების საქონელზე საპასუხო ტარიფები დაუწესა.

როგორც Reuters-ი იუწყება, პრეზიდენტის განკარგულება ეხება აშშ-ის გეოგრაფიული სახელების საინფორმაციო სისტემას (GNIS), რომელიც ამერიკის შეერთებულ შტატებში ოფიციალურ რუკებზე გამოყენებული სახელწოდებების სტანდარტებს განსაზღვრავს. განკარგულება გავლენას არ ახდენს კანადაში მოქმედ სახელწოდებაზე და არც იმაზე, თუ რა სახელით მოიხსენიებს ტბას მსოფლიოს დანარჩენი ნაწილი.

„Google Maps-ს ვაახლებთ ოფიციალურ სამთავრობო წყაროებში სახელწოდებების ცვლილებების შესაბამისად. აშშ-თვის ასეთ წყაროს GNIS წარმოადგენს. შესაბამისად, აშშ-ში Maps-ის მომხმარებლები დაინახავენ სახელწოდებას „ამერიკის ტბა“, კანადაში კვლავ „ონტარიოს ტბა“ იქნება ნაჩვენები, ხოლო აშშ-სა და კანადის ფარგლებს გარეთ მომხმარებლები ორივე სახელწოდებას იხილავენ“, - განაცხადა Google-მა შაბათს გამოქვეყნებულ განცხადებაში.

Google Maps-მა მსგავსი ცვლილება გასულ წელს მექსიკის ყურის შემთხვევაშიც განახორციელა. ტრამპის მიერ პრეზიდენტობის პირველივე დღეს გამოცემული აღმასრულებელი განკარგულების შემდეგ, პლატფორმამ ყურეს „ამერიკის ყურე“ (Gulf of America) უწოდა, წერს Reuters-ი.