ინგლისმა ხორვატიას დაძაბულ ბრძოლაში 4:2 სძლია

ინგლისის ეროვნულმა საფეხბურთო ნაკრებმა მიმდინარე მსოფლიო ჩემპიონატზე პირველი შეხვედრა ხორვატიის გუნდთან გამართა და ანგარიშით 4:2 გაიმარჯვა.

მატჩის მერვე წუთზე ლუკა მოდრიჩმა საჯარიმოში თამაშის წესები დაარღვია, რის გამოც მთავარმა არბიტრმა ხორვატების კარში პენალტი დანიშნა. ინგლისელთა თავდამსხმელმა ჰარი კეინმა თერთმეტმეტრიანი შეასრულა, მაგრამ დომიკინ ლივაკოვიჩმა ის მოიგერია.

მოგვიანებით გაირკვა, რომ თერთმეტმეტრიანის შესრულების დროს ლივაკოვიჩს არცერთი ფეხი კარის ხაზზე არ ედგა, რის გამოც ინგლისს პენალტის მეორედ შესრულება მოუწია. მეორე ცდიდან კეინმა გოლი შეაგდო და ინგლისელები წინ გაიყვანა.

მატჩის 36-ე წუთზე ხორვატმა მარტინ ბატურინამ ეფექტური დარტყმით ანგარიში გაათანაბრა. 42-ე წუთზე ინგლისელებმა მეორედ აიღეს ხორვატების კარი. გატანილი გოლის ავტორი კვლავ ჰარი კეინი იყო.

პირველი ტაიმის დამატებით დროში ხორვატიის ნაკრებმა კვლავ გაათანაბრა ანგარიში. გოლი ინგლისელთა კარში პეტარ მუსამ გაიტანა.

მეორე ტაიმი ინგლისელთა უპირატესობით დაიწყო და უკვე 47-ე წუთზე ჯუდ ბელინგემმა ანგარიში 3:2 გახადა. მატჩის მიწურულს, 85-ე წუთზე მარკუს რაშფორდმა კვლავ აიღო ხორვატთა კარი და საბოლოო ანგარიში 4:2 დააფიქსირა.