ირანში აცხადებენ, რომ აშშ-ის ბაზებზე განხორციელებული იერიშების დროს სამიზნეების 70% დააზიანეს

ირანის ისლამური რევოლუციის გუშაგთა კორპუსის ცნობით, ქვეყნის შეიარაღებული ძალების მიერ ღამით განხორციელებული სარაკეტო და დრონებით შეტევის შედეგად, რეგიონში მდებარე ამერიკული სამხედრო ბაზების სამიზნეების დაახლოებით 70% დაზიანდა. ინფორმაციას ირანული მედია ავრცელებს.

მედიის ცნობით, მონაცემები მოპოვებულია „სატელიტური გამოსახულებებისა და საველე წყაროების მიერ ირანის საგარეო დაზვერვისთვის მიწოდებული ინფორმაციის“ საფუძველზე.

როგორც ირანული მედია იუწყება, შორი მოქმედების ბალისტიკურმა რაკეტებმა და უპილოტო საფრენმა აპარატებმა აშშ-ის სამხედრო ბაზების საჰაერო თავდაცვის სისტემების გარღვევა შეძლეს და წინასწარ შერჩეულ სამიზნეებს დაარტყეს იორდანიის ქალაქ აზრაქში, ქუვეითში მდებარე ალი ალ-სალემის ავიაბაზაზე და ბაჰრეინში განთავსებულ აშშ-ის სამხედრო-საზღვაო ძალების მეხუთე ფლოტის ბაზაზე.

ამასთან, სააგენტო Reuters-ი, რომელიც აშშ-ის თავდაპირველ შეფასებებს ეყრდნობა, იუწყება, რომ ირანის მიერ რეგიონში მდებარე ამერიკული სამხედრო ობიექტების მიმართულებით გაშვებული თითქმის ყველა რაკეტა და დრონი საჰაერო თავდაცვის სისტემებმა გაანეიტრალეს.