იტალიის საგარეო საქმეთა მინისტრი: მხარს ვუჭერთ იმ პროცესის დაწყებას, რომელიც უკრაინას ევროკავშირში მიიყვანს, მაგრამ არ უნდა დაგვავიწყდეს, რომ არსებობენ სხვა კანდიდატი ქვეყნებიც - ჩვენთვის პრიორიტეტი ბალკანეთია

იტალია მხარს უჭერს უკრაინის ევროკავშირში გაწევრიანების პროცესის დაწყებას, თუმცა სხვა კანდიდატი ქვეყნების ინტერესებსაც ითვალისწინებს და რომისთვის პრიორიტეტად დასავლეთ ბალკანეთი რჩება. ამის შესახებ იტალიის საგარეო საქმეთა მინისტრმა, ანტონიო ტაიანიმ ლიმასოლში ჟურნალისტებთან საუბრისას განაცხადა.

მინისტრმა ხაზგასმით აღნიშნა, რომ მიუხედავად უკრაინის მხარდაჭერისა, ევროკავშირმა არ უნდა დაივიწყოს სხვა სახელმწიფოები, რომლებიც წლებია გაფართოების რიგში დგანან.

„ჩვენ მხარს ვუჭერთ იმ პროცესის დაწყებას, რომელიც უკრაინას ევროკავშირში მიიყვანს, მაგრამ არ უნდა დაგვავიწყდეს, რომ არსებობენ სხვა კანდიდატი ქვეყნებიც. ჩვენთვის პრიორიტეტი ბალკანეთია. ამავდროულად, ძალაში რჩება ისიც, რომ უკრაინამ და მოლდოვამ უნდა დაიწყონ ეს გზა, ებრძოლონ კორუფციას და დაიცვან წესები ევროკავშირის წევრობისთვის. ჩვენ მზად ვართ, შევასრულოთ ჩვენი როლი მათ დასახმარებლად“, - აღნიშნა ანტონიო ტაიანიმ.