კალასის განცხადებით, მაისის ბოლოს ევროკავშირი პუტინთან მოლაპარაკებების საკითხსა და რუსეთისადმი წასაყენებელ მოთხოვნებს განიხილავს

ევროკავშირის უმაღლესმა წარმომადგენელმა საგარეო საქმეთა და უსაფრთხოების პოლიტიკის საკითხებში, კაია კალასმა განაცხადა, რომ 27-28 მაისს კვიპროსზე, ევროკავშირის საგარეო საქმეთა მინისტრების არაფორმალურ შეხვედრაზე, რუსეთთან შესაძლო მოლაპარაკებებისა და იმ მოთხოვნების განხილვა იგეგმება, რომლებიც ევროკავშირმა მოსკოვს უნდა წაუყენოს.

„რუსეთთან დაკავშირებით უნდა განვიხილოთ, თუ რაზე გვსურს მათთან საუბარი. სწორედ ამიტომ, გვიახლოვდება შეხვედრა საგარეო საქმეთა მინისტრებთან, სადაც განვიხილავთ ჩემ მიერ წარდგენილ წინადადებებს არსებული საკითხების გადასაჭრელად“, - განაცხადა კალასმა.

მან ხაზგასმით აღნიშნა, რომ „ევროპული უსაფრთხოების საკითხი იმაში მდგომარეობს, რომ რუსეთი მუდმივად ესხმის თავს მეზობლებს და ჩვენ უნდა ვიპოვოთ გზა, როგორ შევაჩეროთ ეს“.

„ამისათვის ჩვენ გვჭირდება დათმობები რუსეთის მხრიდანაც“, - განაცხადა ევროკავშირის მთავარმა დიპლომატმა.

ამავდროულად, მან უარყო გერმანიის ყოფილი კანცლერის, გერჰარდ შრედერის კანდიდატურა ევროკავშირიდან რუსეთთან მოლაპარაკებების წარმოების საკითხში.

ოფიციალური ბერლინი ასევე არ იღებს პუტინის წინადადებას შრედერის ევროკავშირის მომლაპარაკებლად დანიშვნის შესახებ და ამაში ევროპასა და გერმანელ პოლიტიკოსებს შორის განხეთქილების შეტანის მცდელობას ხედავს.