მაია ბითაძე: დარწმუნებული ვარ, ევროკავშირს მოუწევს იმის გააზრება, რომ თვითონ შევიდა ისეთ სპირალში, საიდანაც გამოსვლა ძალიან უჭირთ - ევროკავშირს საქართველო ძალიან სჭირდება

ევროკავშირს, ადრე თუ გვიან, ქართველი ხალხის ნების გათვალისიწინება მოუწევს, - განაცხადა გადაცემაში „ღია ეთერი-დებატები“ გარემოს დაცვისა და ბუნებრივი რესურსების საპარლამენტო კომიტეტის თავმჯდომარე მაია ბითაძემ.

ბითაძე არ ეთანხმება იმ მოსაზრებას, რომ ევროკავშირსა და საქართველოს შორის დაძაბული ურთიერთობა ახლა პიკშია. მან ასევე აღნიშნა, რომ ევროკავშირს საქართველო ძალიან სჭირდება.

„გადავლილია ის ფაზა, როდესაც წევრ სახელმწიფოებთან ორმხრივი შეხვედრების დროსაც დაძაბულობა იყო. მიუხედავად იმისა, რომ ვიზალიბერალიზაცია დიპლომატიური პასპორტებისთვის შეჩერებულია, მოწვევებს მაინც ვღებულობთ და ევროკავშირის წევრ სახელმწიფოებში უპრობლემოდ დავდივართ, ვხვდებით ჩვენს კოლეგებს, რომლებიც კარგად იაზრებენ, რომ გეოპოლიტიკური და ეკონომიკური ტურბულენტობებიდან გამომდინარე, საქართველოს ხელისუფლებასთან დიალოგი აუცილებელია.

დარწმუნებული ვარ, ევროკავშირს მოუწევს იმის გააზრება, რომ თვითონ შევიდა ისეთ სპირალში, საიდანაც გამოსვლა ძალიან უჭირთ. ამ ურთიერთობების გადაწყობა-გადალაგება არ არის მხოლოდ ისე, რომ „ქართული ოცნება“, საქართველოს მოსახლეობა ისევ თავჩახრილი იყოს. როდესაც დემოკრატიაზე და პარტნიორობაზე საუბრობენ, გაიაზრონ, რომ საქართველოს ხელისუფლებას თავისი ინტერესები აქვს, ჩვენ ევროკავშირში წევრობა გვინდა ჩვენი ინტერესების გათვალისწინებით“, - აღნიშნა მაია ბითაძემ.

ბითაძემ გადაცემის ბოლოს დასძინა, რომ ევროკავშირში, ახალი მენეჯმენტის და ხელმძღვანელობის პირობებში, ძალიან მოხშირდა კანდიდატის სახელმწიფოების „დაშანტაჟების“ სხვადასხვა მეთოდი.

„ძალიან მოხშირდა კანდიდატი სახელმწიფოების ე.წ. დაშანტაჟების სხვადასხვა მეთოდი. მაკედონიასთან სხვა მოთხოვნები აქვთ, ჩვენთან ეს მოთხოვნები აქვთ, სერბეთთან სხვა, ასე, რომ ევროკავშირში გაწევრიანების ინსტრუმენტალიზაციამ ისეთი მახინჯი ფორმა მიიღო, რომელიც დამაზიანებელია ევროკავშირისთვის“, - აღნიშნა ბითაძემ.