მაკა ბოჭორიშვილი: ჩვენთვის არის ერთი რამ მნიშვნელოვანი, რომ ევროკავშირის ყველა ინსტიტუტის მხრიდან საქართველოსთან მიმართებით იყოს სამართლიანი და რეალისტური დამოკიდებულება, ეს ჩვენზე მეტად დღეს სჭირდება ევროპას

ჩვენთვის არის ერთი რამ მნიშვნელოვანი, რომ ევროკავშირის ყველა ინსტიტუტის მხრიდან საქართველოსთან მიმართებაში იყოს სამართლიანი და რეალისტური დამოკიდებულება, - განაცხადა გადაცემაში „იმედი LIVE“ საქართველოს საგარეო საქმეთა მინისტრმა მაკა ბოჭორიშვილმა. მისი თქმით, ეს საქართველოზე მეტად დღეს ევროპას სჭირდება.

„ერთი მხრივ, შეცვლილ რიტორიკაზე საუბარი ცოტა ხნის წინ დაიწყო ევროკავშირის წევრი ქვეყნების მხრიდან. ბუნებრივია, შეუძლებელია ეს ვერ შევამჩნიოთ, რომ არ არის ის ენთუზიაზმი საქართველოს კრიტიკასთან დაკავშირებით, რასაც ჩვენ ვხედავდით ერთი-ორი წლის წინ და გარკვეულწილად იცვლება, უფრო რეალურ ჩარჩოებში ბრუნდება ურთიერთობები. მეორე მხრივ, ვხედავთ ევროპარლამენტის საგარეო კომიტეტის სხდომაზე საქართველოს შესახებ მორიგ ანგარიშს, რომელიც ისევ და ისევ არის სრულიად აბსურდული დოკუმენტი. როგორ გავიგოთ ახლა ასეთი გზავნილები ბრიუსელიდან. საქართველოს საზოგადოებამ კი კარგად იმეცადინა ამასობაში ევროკავშირის ინსტიტუტებში და ევროკავშირის სტრუქტურაში. ერთი მხრივ, ვისაუბროთ ურთიერთობებზე, რომელიც სასიცოცხლოდ სჭირდება ევროპას, ევროკავშირს, ბრიუსელს. მეორე მხრივ, ჩვენ ვუყუროთ ევროკავშირის ერთ-ერთი ინსტიტუტის ასეთ დამოკიდებულებას, რომელსაც შიგნით ძალიან ხშირად იხსენიებენ ხოლმე, ეს არ არის ისეთი მნიშვნელოვანი. მეორე მხრივ, იგივე ევროპარლამენტის პრეზიდენტი შეგვახსენებს რომ ეს ხალხის არჩეული დემოკრატიული ინსტიტუტია და მნიშვნელოვანია. მოკლედ, მნიშვნელოვანი არის თუ არ არის, ჩვენთვის არის ერთი რამ მნიშვნელოვანი, რომ ევროკავშირის ყველა ინსტიტუტის მხრიდან საქართველოსთან მიმართებაში იყოს სამართლიანი და რეალისტური დამოკიდებულება. ეს ჩვენზე მეტად დღეს სჭირდება ევროპას, ისევ და ისევ ევროკავშირს იმისთვის, რომ რეპუტაციაც დაიცვას და შენარჩუნდეს, ვინაიდან ასეთი რეზოლუციები, ასეთი დოკუმენტები პირველ რიგში მათ რეპუტაციაზე მეტყველებს ცუდად, თორემ ამ პატარა საზოგადოებაში ძალიან რთულია დამალო რამე და დაიჯერო ის, რაც წერია ევროპარლამენტის დოკუმენტში. წარმოუდგენელია მისი სერიოზულად აღქმა ჩვენი საზოგადოების მხრიდანაც. ასე რომ მნიშვნელოვანია თავის რეპუტაციას გაუფრთხილდნენ პირველ რიგში და სერიოზული საუბარი გვქონდეს, ვინაიდან ეს სჭირდება ევროპას დღეს. სჭირდება საქართველო, სჭირდება სამხრეთ კავკასია და ამას ვერავინ ვეღარ უარყოფს, უფრო მეტად საუბრობენ.

მეორე მხრივ, ისევ და ისევ კონკრეტული პირები, რომლებიც დღეს იკავებენ წამყვან თანამდებობებს ბრიუსელში, მაქსიმალურად ცდილობენ ისაუბრონ ისე, რომ არ ახსენონ საქართველო. ჩაატარონ შეხვედრები ისე, მათ შორის დაკავშირებადობაზე, რომ არ ჰყავდეთ საქართველო და უნდათ, რომ ამავდროულად სერიოზულად გამოიყურებოდნენ. წარმოუდგენელია, ეს ორი ერთმანეთთან აბსოლუტურად შეუთავსებელია. ისაუბრო დაკავშირებადობაზე და იქ არ გყავდეს საქართველო და არ ესაუბრო მას“, - აღნიშნა მაკა ბოჭორიშვილმა.