მარკო რუბიო: ირანს ბირთვული იარაღი რომ ჰქონოდა, მთელ რეგიონს მძევლად აიყვანდა

აშშ-ის სახელმწიფო მდივნის მარკო რუბიოს განცხადებით, ირანს ბირთვული იარაღი რომ ჰქონდა, მთელი რეგიონი მისი მძევალი იქნებოდა.

რუბიომ მაგალითად მოიყვანა ჰორმუზის სრუტე. მისი თქმით ჰორმუზი ფაქტობრივად ეკონომიკური ბირთვული იარაღია, რომელსაც ირანი მთელი მსოფლიოს წინააღმდეგ იყენებს.

„წარმოიდგინეთ, ამ ადამიანებს ბირთვულ იარაღთან წვდომა რომ ჰქონოდათ. ისინი მთელ რეგიონს მძევლად აიყვანდნენ. ვერაფერს ვუზამდით „ჰეზბოლას“, „ჰამასს“, ერაყის შიიტურ მეამბოხეებს, რადგან ისინი ბირთვული იარაღით იქნებოდნენ და იტყოდნენ, რომ ხელშეუხებელნი არიან. ეჭვი არ მეპარება, რომ თუ აღნიშნული რადიკალები ირანის ხელისუფლებაში დარჩებიან, ერთ დღეს გადაწყვეტენ, რომ მათ ბირთვული იარაღი სჭირდებათ“, - განაცხადა რუბიომ Fox News-ის ეთერში.

როგორც აშშ-ის პირველმა დიპლომატმა დასძინა, ირანის ბირთვული პროგრამა ფუნდამენტური საკითხია და მისი გადაწყვეტა საკვანძო პრობლემად რჩება.