ნიკოლ ფაშინიანს იმედი აქვს, რომ 2028 წელს „ევროპული პოლიტიკური გაერთიანების“ სამიტს აზერბაიჯანში დაესწრება

სომხეთის პრემიერ-მინისტრ ნიკოლ ფაშინიანს იმედი აქვს, რომ 2028 წელს „ევროპული პოლიტიკური გაერთიანების“ სამიტს აზერბაიჯანში დაესწრება.

აღნიშნულზე ნიკოლ ფაშინიანმა ერევანში, „ევროპული პოლიტიკური გაერთიანების“ სამიტზე სიტყვით გამოსვლისას განაცხადა.

სომხეთის მთავრობის მეთაურმა ხაზი გაუსვა იმ ფაქტსაც, რომ აზერბაიჯანის პრეზიდენტი წელს პირველად, მართალია, დისტანციურად, მაგრამ მონაწილეობს სომხეთში მიმდინარე ღონისძიებაში.

„თეთრ სახლში ამერიკის პრეზიდენტის დონალდ ტრამპის მხარდაჭერითა და მონაწილეობით მე და აზერბაიჯანის პრეზიდენტმა მივიღეთ მშვიდობის დეკლარაცია, რომელსაც მოწმის სახით ხელი მოაწერა პრეზიდენტმა დონალდ ტრამპმა. ახლა კი ძალიან მნიშვნელოვანი პროექტის განხორციელების გზაზე ვართ, რომელსაც ჰქვია ტრამპის გზა მშვიდობისა და კეთილდღეობისთვის. ეს პირველი შემთხვევაა, როდესაც აზერბაიჯანის პრეზიდენტი სომხეთში მიმდინარე ღონისძიებას ესწრება, თუმცა ონლაინ ფორმატში. იმედი მაქვს მომეცემა შესაძლებლობა, რომ 2008 წლის სამიტს აზერბაიჯანში დავესწრო“, - აღნიშნა ფაშინიანმა.

მისი თქმით, პირველი შეხვედრა თურქეთის პრეზიდენტთან ასევე გაიმართა „ევროპული პოლიტიკური გაერთიანების“ სამიტზე, რომელიც პრაღაში ჩატარდა. დღეს ერევანში მიმდინარე სამიტში მონაწილეობს თურქეთის ვიცე-პრეზიდენტი. ​ფაშინიანის თქმით, ეს თურქეთის ვიცე-პრეზიდენტის პირველი ვიზიტია სომხეთში.