POLITICO: ევროპაში აშშ-ის ჯარების შემცირებამ კონტინენტი შოკში ჩააგდო, თუმცა რუტემ „მხრები აიჩეჩა“

ნატოს გენერალურმა მდივანმა მარკ რუტემ ევროპიდან სამხედროების გაყვანის შესახებ აშშ-ის პრეზიდენტის დონალდ ტრამპის მოულოდნელი გადაწყვეტილების მნიშვნელობა დააკნინა და აღნიშნა, რომ ნებისმიერი შემცირება „სტრუქტურირებულად“ მოხდება. სტატიას ამ შინაარსით POLITICO აქვეყნებს.

„ვიცით, რომ კორექტირება იქნება, აშშ-მა ორიენტაცია უნდა შეცვალოს, მაგალითად აზიაზე, მაგრამ ეს გარკვეული დროის განმავლობაში, სტრუქტურირებულად მოხდება“, - განუცხადა რუტემ ჟურნალისტებს.

მისივე თქმით, ევროპის საქმეებში აშშ-ის ჩართულობა მაინც იქნება უზრუნველყოფილი.

გამოცემის ცნობით, მოსალოდნელია, რომ ვაშინგტონი ევროპიდან მინიმუმ 5 ათას ჯარისკაცს გაიყვანს, პოლონეთში როტაციული ქვედანაყოფის ჩათვლით. ეს არის პირველი ნაბიჯი, რომელმაც ნატოს მოკავშირეები გააოგნა და ისედაც დასუსტებულ ტრანსატლანტიკურ ურთიერთობებს ახალი დარტყმა მიაყენა.

როგორც POLITICO იუწყება, ჯარების დისლოკაციის ადგილის შეცვლა ირანში ომის გამო ტრამპსა და გერმანიის კანცლერს ფრიდრიხ მერცს შორის მომხდარი სიტყვიერი დაპირისპირების შედეგია.

ამასთან, პოლონეთმა, რომელიც ევროპაში ამერიკის ერთ-ერთ სანდო პარტნიორად მიიჩნევა, მიმდინარე კვირას ვაშინგტონში სასწრაფოდ გააგზავნა ოფიციალური პირები, რათა მეტი სიცხადე შემოეტანა.