POLITICO: უკრაინა მოკავშირეებს დამატებით 20 მილიარდ დოლარს სთხოვს, რათა რუსეთზე ზეწოლა გააძლიეროს
უკრაინა მოკავშირე ქვეყნებისგან დამატებით 20 მილიარდი დოლარის მიღებას გეგმავს, რათა ბრძოლის ველზე არსებული დროებითი უპირატესობა გაამყაროს და რუსეთზე ზეწოლა კიდევ უფრო გაზარდოს. ინფორმაციას POLITICO უკრაინის თავდაცვის სამინისტროს ერთ-ერთ მაღალჩინოსანზე დაყრდნობით ავრცელებს.
„ყველა ხედავს, რომ რუსეთი იწვის და ჩვენ გვინდა, რომ კიდევ უფრო მეტად იწვოდეს, თუმცა ამისთვის დაფინანსება გვჭირდება“, - ციტირებს გამოცემა წყაროს.
მისი თქმით, 20 მილიარდი დოლარის მოთხოვნა ოფიციალურად 18 ივნისს რამშტაინში გასამართ უკრაინის საკონტაქტო ჯგუფის შეხვედრაზე გაჟღერდება.
ინფორმირებული წყაროების ცნობით, საკითხი უკრაინის თავდაცვის მინისტრმა მიხაილო ფიოდოროვმა და მთავრობის სხვა წარმომადგენლებმა უკვე განიხილეს ნორვეგიის, შვედეთის, გერმანიისა და კანადის წარმომადგენლებთან გამართულ შეხვედრებზე.
უკრაინული მხარის გათვლებით, პარტნიორ ქვეყნებს ინდივიდუალურად 2-დან 6 მილიარდ დოლარამდე თანხის გამოყოფას სთხოვენ, რათა საერთო ჯამში 20 მილიარდი დოლარის მობილიზება მოხდეს.
„ეს შეიძლება იყოს როგორც პირდაპირი დახმარება, ისე სესხი“, - აღნიშნა უკრაინელმა ოფიციალურმა პირმა.
უკრაინისთვის დახმარების საკითხი ერთ-ერთი მთავარი თემა იქნება ივლისში ანკარაში დაგეგმილ ნატოს ლიდერთა სამიტზეც, რომელსაც უკრაინის პრეზიდენტი ვოლოდიმირ ზელენსკიც დაესწრება.
