პოლონეთის პრეზიდენტი უკრაინის გაწევრიანებას ევროკავშირში ეწინააღმდეგება - ევროპულ ოჯახში ადგილი არ არის ბანდიტებისა და მკვლელებისთვის, რომლებმაც ქალები და ბავშვები მოკლეს. ასეთი ბანდიტების განდიდება არ შეიძლება

პოლონეთის პრეზიდენტმა კაროლ ნავროცკიმ განაცხადა, რომ ის ევროკავშირში უკრაინის გაწევრიანებას ეწინააღმდეგება.

პოლონეთის პირველი პირის თქმით, მისი პოზიცია განპირობებულია იმით, რომ რამდენიმე დღის წინ უკრაინის პრეზიდენტმა ვოლოდიმირ ზელენსკიმ ერთ-ერთ უკრაინულ ქვედანაყოფს „უკრაინის მეამბოხე არმიის გმირების“ სახელი მიანიჭა. პოლონური მხარე მიიჩნევს, რომ „უკრაინის მეამბოხე არმია“ ვოლინის ტრაგედიასთან არის დაკავშირებული.

„სამწუხაროდ, პრეზიდენტმა ზელენსკიმ აჩვენა, რომ უკრაინა მენტალობიდან გამომდინარე, რომელიც „უკრაინის მეამბოხე არმიიდან“ ბანდიტებისა და მკვლელების განდიდებას გულისხმობს, არ არის მზად გახდეს ევროპული ოჯახის წევრი. იმიტომ, რომ ევროპულ ოჯახში პოლონელი ქალებისა და ბავშვების მკვლელი ბანდიტების განდიდება არ შეიძლება“, - განაცხადა ნავროცკიმ.

აღსანიშნავია, რომ მანამდე ნავროცკი ზელენსკისთვის 2023 წელს გადაცემული პოლონეთის უმაღლესი ჯილდოს, თეთრი არწივის ორდენის ჩამორთმევის იდეით გამოვიდა.

Zaproponowałem, aby jednym z punktów było odebranie prezydentowi Zełenskiemu Orderu Orła Białego - Prezydent RP @NawrockiKn. pic.twitter.com/4NaOAIjO3C — Kancelaria Prezydenta RP (@prezydentpl) May 29, 2026