„რადიო თავისუფლების“ უკრაინული სამსახური: უკრაინა რეფორმების დაგვიანების გამო ევროკავშირის დახმარების ნაწილის დაკარგვის რისკის წინაშე დგას

უკრაინა შესაძლოა ევროპული ფინანსური დახმარების შემცირების წინაშე პირველად დადგეს. ამის მიზეზი პროგრამა Ukraine Facility-ის ფარგლებში ნაკისრი მთელი რიგი ვალდებულებების დროულად შეუსრულებლობაა. ინფორმაციას ამის შესახებ „რადიო თავისუფლების“ უკრაინული სამსახური ევროკომისიის პასუხზე დაყრდნობით ავრცელებს.

„არის ორი ნაბიჯი, რომლებიც მე-4 და მე-5 ტრანშებს უკავშირდება და რომლებიც დროულად არ დასრულებულა. ამ ტრანშებთან დაკავშირებული თანხების გაცემა შეჩერებულია. ეს ნიშნავს, რომ ისინი ჯერ არ გადახდილა“, - განმარტავენ ევროკომისიაში.

საფრთხის ქვეშაა დაახლოებით 300 მილიონი ევრო მეოთხე ტრანშიდან და 380 მილიონ ევროზე მეტი მეხუთე ტრანშიდან.

ევროკომისიის წარმომადგენელმა ჟურნალისტებს განუცხადა, რომ ამ დროისთვის შეუსრულებელი რჩება ორი მთავარი ვალდებულება, რაც უმაღლესი ანტიკორუფციული სასამართლოს შტატის გაფართოებასა და მოსამართლეთა დეკლარაციების შემოწმების შესახებ კანონის მიღებას გულისხმობს.

სიტუაციის გამოსასწორებლად კიევს დრო შესაბამისად 30 ივნისამდე და 29 სექტემბრამდე აქვს. თუ აღნიშნული ვადებიც დაირღვევა, ევროკავშირმა შესაძლოა ეს თანხები საბოლოოდ უკან გაიწვიოს.

მიუხედავად შეფერხებისა, ევროკომისიაში ხაზგასმით აღნიშნეს, რომ მიმდინარე ომის გათვალისწინებით უკრაინისთვის მოქმედებს მოქნილობის სპეციალური მექანიზმი, ხოლო რეფორმების საერთო პროგრესს ბრიუსელი მთლიანობაში დადებითად აფასებს.

ამის დასტურად, დღესვე დამტკიცდა მორიგი ტრანში უკრაინისთვის - 2.8 მილიარდი ევრო იმავე პროგრამის ფარგლებში. საერთო ჯამში, Ukraine Facility-ის პროგრამა 2027 წლამდე უკრაინისთვის სულ 50 მილიარდი ევროს გამოყოფას ითვალისწინებს.