„რესპუბლიკელებმა“ გააუქმეს კენჭისყრა რეზოლუციაზე, რომელიც ტრამპს ირანიდან აშშ-ის შეიარაღებული ძალების გაყვანას ან ომის გასაგრძელებლად კონგრესისგან ოფიციალური თანხმობის მიღებას ავალდებულებდა - გადაწყვეტილება მას შემდეგ მიიღეს, რაც ნათელი გახდა, რომ მათ დოკუმენტის ჩასაგდებად საკმარისი ხმები არ ჰქონდათ

წარმომადგენელთა პალატის „რესპუბლიკელებმა“ ხუთშაბათს მოულოდნელად გააუქმეს კენჭისყრა რეზოლუციაზე, რომელიც პრეზიდენტ ტრამპს ირანიდან აშშ-ის შეიარაღებული ძალების გაყვანას ან ომის გასაგრძელებლად კონგრესისგან ოფიციალური თანხმობის მიღებას ავალდებულებდა.

ლიდერებმა ეს გადაწყვეტილება მას შემდეგ მიიღეს, რაც ნათელი გახდა, რომ მათ დოკუმენტის ჩასაგდებად საკმარისი ხმები არ ჰქონდათ.

„ეს უკანდახევა სერიოზული დარტყმაა „რესპუბლიკური“ პარტიისთვის, რომელმაც აშკარად გამოაჩინა შიდა განხეთქილება მიმდინარე კონფლიქტის ირგვლივ - თანაც იმ ფონზე, როდესაც პარტიამ ბოლო დროს დაიწყო უფრო აქტიური წინააღმდეგობის გაწევა დონალდ ტრამპისა და მისი დღის წესრიგისთვის“, - წერს გამოცემა The New York Times-ი.

მომხდარი მარცხია წარმომადგენელთა პალატის სპიკერისთვის, მაიკ ჯონსონისთვის. ჯონსონი ყველანაირად ცდილობდა, პრეზიდენტის სურვილისამებრ, ჩაეხშო ნებისმიერი მცდელობა, რომელიც ირანის ომის შეზღუდვას ან გადახედვას ისახავდა მიზნად.

თუმცა, შუალედური არჩევნების მოახლოებასთან ერთად, მას საკუთარ პარტიაში მზარდ უკმაყოფილებასა და ფრთხილ განწყობებთან უწევს გამკლავება, რასაც ემატება „რესპუბლიკელების“ უკიდურესად მცირე უმრავლესობა პალატაში.