Reuters: აშშ-მა ირანი დაბომბა
ამერიკელმა სამხედროებმა ირანის უპილოტო საფრენი აპარატების ბაზა დაბომბეს, რომელიც ჰორმუზის სრუტეში კომერციულ ნაოსნობას და ამერიკულ ძალებს საფრთხეს უქმნიდა. ინფორმაციას Reuters-ი ავრცელებს.
როგორც ერთ-ერთმა ამერიკელმა ჩინოვნიკმა სააგენტოს განუცხადა, ამერიკელმა სამხედროებმა ჯერ ოთხი ირანული უპილოტო საფრენი აპარატი ჩამოაგდეს, ხოლო შემდეგ საპორტო ქალაქ ბანდარ-აბასში მდებარე მათი მართვისთვის საჭირო სახმელეთო ბაზა დაბომბეს.
„აღნიშნული მოქმედებები კარგად მოფიქრებული, თავდაცვითი იყო. მათ მიზანს ცეცხლის შეწყვეტის რეჟიმის მხარდაჭერა წარმოადგენდა“, - ციტირებს სააგენტო ერთ-ერთ ამერიკელ ჩინოვნიკს.
აღსანიშნავია, რომ მიმდინარე კვირას აშშ ირანს უკვე მეორედ ბომბავს. ორშაბათს ამერიკელმა სამხედროებმა სამხრეთ ირანი დაბომბეს და ამას თავდაცვითი აქცია უწოდეს, თუმცა თეირანმა აღნიშნული ცეცხლის შეწყვეტის რეჟიმის „უხეშ დარღვევად“ შეაფასა.
იმედი
წყარო: imedinews.ge