Reuters: CIA-ს შეფასებით, აშშ-ის მიერ ირანის პორტების ბლოკადა თეირანზე კიდევ დაახლოებით ოთხი თვის განმავლობაში ვერ მოახდენს კრიტიკულ ეკონომიკურ ზეწოლას

აშშ-სა და ირანს შორის ომის დასრულების ძალისხმევა, როგორც ჩანს, შეფერხდა, რადგან პარასკევს მხარეებმა სპარსეთის ყურეში ცეცხლი გახსნეს - ამავდროულად, აშშ-ის დაზვერვის ანალიზმა დაასკვნა, რომ თეირანს საზღვაო ბლოკადისთვის გაძლება თვეების განმავლობაში შეუძლია, - წერს საინფორმაციო სააგენტო Reuters-ი.

ცენტრალური სადაზვერვო სააგენტოს (CIA) შეფასებით, ამერიკის მიერ ირანის პორტების ბლოკადა თეირანზე კიდევ დაახლოებით ოთხი თვის განმავლობაში ვერ მოახდენს კრიტიკულ ეკონომიკურ ზეწოლას.

ეს მიანიშნებს იმაზე, რომ აშშ-ის ბერკეტები ირანზე კვლავ შეზღუდულია იმ ფონზე, როდესაც მხარეები ცდილობენ დაასრულონ კონფლიქტი, რომელიც ამერიკელ ამომრჩეველთა შორის პოპულარობით არ სარგებლობს.

ბოლო დღეებში ჰორმუზის სრუტეში და მის შემოგარენში დაფიქსირდა საბრძოლო მოქმედებების ყველაზე მძლავრი ესკალაცია ერთი თვის წინ გამოცხადებული ზავის შემდეგ. ამავდროულად, პარასკევს არაბთა გაერთიანებული საამიროები განახლებული თავდასხმის სამიზნე გახდა.

ვაშინგტონი ელოდება თეირანის პასუხს აშშ-ის წინადადებაზე, რომელიც ომის ოფიციალურად დასრულებას ითვალისწინებს, ვიდრე დაიწყება მოლაპარაკებები უფრო სადავო საკითხებზე, მათ შორის ირანის ბირთვულ პროგრამაზე.