Reuters: ევროკავშირი ალბანეთისგან რეაგირებას მოითხოვს - ჯარედ კუშნერთან დაკავშირებული კურორტის პროექტი ევროპულ გარემოსდაცვით სტანდარტებს საფრთხეს უქმნის

ევროკომისიამ მოუწოდა ალბანეთს, დაუყოვნებლივ იმოქმედოს ევროკავშირის გარემოსდაცვით კანონმდებლობასთან შესაბამისობის უზრუნველსაყოფად, თუ მას ბლოკში გაწევრიანება სურს.

ორშაბათს, ალბანეთის პრემიერ-მინისტრმა, ედი რამამ Reuters-თან ინტერვიუში განაცხადა, რომ მისი ქვეყანა არ შეაჩერებს მდიდრული კურორტის მშენებლობას, რომელსაც აშშ-ის პრეზიდენტის, დონალდ ტრამპის სიძე, ჯარედ კუშნერი და მისი ქალიშვილი ივანკა ტრამპი ბალკანეთის სანაპიროს მოშორებულ მონაკვეთზე გეგმავენ, მიუხედავად პროტესტისა, რომელიც მის გარემოზე ზემოქმედებას უკავშირდება.

საპროტესტო აქციებს „ფლამინგოების რევოლუცია“ შეარქვეს, რადგან სანაპიროს ეს მონაკვეთი ამ ფრინველების მიგრაციისას დროებითი გაჩერების ადგილია. ეს პროტესტი უფრო ფართო ოპოზიციურ მოძრაობაში გადაიზარდა, რომელიც მიმართულია რამას 13-წლიანი მმართველობის სხვადასხვა ასპექტის წინააღმდეგ.

ევროკავშირმა განაცხადა, რომ მას შეუძლია მიიღოს ახალი წევრები, მათ შორის მონტენეგრო, ალბანეთი და უკრაინა 2030 წლისთვის, თუმცა ეს დამოკიდებულია ევროკავშირის კანონებთან შესაბამისობაზე, მათ შორის გარემოს დაცვის სფეროში.

„ალბანეთმა თავი უნდა შეიკავოს ისეთი ქმედებებისგან, რომლებმაც შესაძლოა ხელი შეუშალოს საბოლოო კრიტერიუმების შესრულებას, და ჩვენ ველოდებით, რომ ალბანეთის ხელისუფლება დაუყოვნებლივ იმოქმედებს“, - განაცხადა პრესსპიკერმა გიიომ მერსიემ.

„ჩვენ კავშირი გვაქვს ალბანეთის ხელისუფლებასთან ამ საკითხთან დაკავშირებით“, - დასძინა მან.

ტირანასა და სამხრეთ სანაპიროზე, სადაც კურორტის მშენებლობაა დაგეგმილი, გასული კვირის განმავლობაში გამართული საპროტესტო აქციების ფონზე, რამამ გარემოსდაცვითი შეშფოთება დააკნინა და განაცხადა, რომ გარემოზე ზემოქმედების შეფასება დასრულდება.

„ჩვენ ძალიან ვამაყობთ იმით, რაც ალბანეთში ველური ბუნებისთვის გავაკეთეთ. ევროკომისიას არ აქვს საფუძველი, ეჭვი შეიტანოს ჩვენს მტკიცე ნებაში - დავიცვათ ყველაფერი, რაც დასაცავია, როდესაც საქმე ველურ ბუნებასა და ბუნებას ეხება“, - თქვა მან.