Reuters: უკრაინის სოფლის მეურნეობის მინისტრის განცხადებით, რუსულმა საჰაერო დარტყმებმა სურსათის საცალო ქსელების ლოგისტიკური ინფრასტრუქტურის 90% გაანადგურა

უკრაინის სოფლის მეურნეობის მინისტრის განცხადებით, რუსულმა საჰაერო დარტყმებმა სურსათის საცალო ქსელების ლოგისტიკური ინფრასტრუქტურის 90% გაანადგურა. ინფორმაციას ამის შესახებ სააგენტო Reuters-ი ავრცელებს.

მინისტრის ეს განცხადება ნათლად აჩვენებს იმ იერიშების მასშტაბს, რომლებსაც მოსკოვი უკრაინის ლოგისტიკურ სექტორზე სულ უფრო ინტენსიურად ახორციელებს.

ბოლო კვირებში ორმხრივი დარტყმები ეკონომიკურ სამიზნეებზე, მათ შორის მსხვილ საცალო სექტორზე, კიდევ უფრო ინტენსიური გახდა. რუსული მხარე იერიშებს ახორციელებს უკრაინის წამყვანი სუპერმარკეტების საწყობებზე, უმსხვილეს საფოსტო ოპერატორსა და საოჯახო ნივთების ჰიპერმარკეტების ქსელებზე.

„დღეის მონაცემებით, საცალო ქსელების კუთვნილი კვების ლოგისტიკური ობიექტების დაახლოებით 90% განადგურებულია, თუმცა ეს იმას არ ნიშნავს, რომ უკრაინას შიმშილი ემუქრება“, - განაცხადა სოფლის მეურნეობის მინისტრმა, ტარას ვისოცკიმ.

კიევში ჟურნალისტებთან გაკეთებული ეს განცხადება ყველაზე ღია ოფიციალური აღიარებაა იმ მძიმე ზარალისა, რაც რუსულმა სარაკეტო იერიშებმა მიაყენა უკრაინის ეკონომიკას.

ლოგისტიკურ ცენტრებზე განხორციელებული იერიშების გამო, ბოლო კვირებში კიევის ცალკეულ სუპერმარკეტებში პერიოდულად იქმნებოდა ახალი ხილის, ბოსტნეულის, შაქრის, რძის ნაწარმისა და სხვა პირველადი მოხმარების პროდუქტების დეფიციტი.