Reuters/Ipsos-ის გამოკითხვა: ირანთან ომის მიმართ ამერიკის მოსახლეობის მხარდაჭერა კონფლიქტის დაწყების შემდეგ ყველაზე დაბალ ნიშნულამდე დაეცა

Reuters/Ipsos-ის საზოგადოებრივი აზრის ახალი გამოკითხვის თანახმად, ირანთან ომის მიმართ ამერიკის მოსახლეობის მხარდაჭერა კონფლიქტის დაწყების შემდეგ ყველაზე დაბალ ნიშნულამდე დაეცა.

ოთხდღიანი გამოკითხვის შედეგები აჩვენებს, რომ ირანის წინააღმდეგ აშშ-ის სამხედრო მოქმედებებს ამერიკელების მხოლოდ 31% უჭერს მხარს. ეს მაჩვენებელი შემცირებულია მარტის გამოკითხვასთან (37%) და ამავე თვის დასაწყისში დაფიქსირებულ მონაცემთან (34%) შედარებით.

მხარდაჭერის ვარდნა ძირითადად „რესპუბლიკელი“ ამომრჩევლების პოზიციის ცვლილებამ განაპირობა - ომს მხარს „რესპუბლიკელ“ რესპონდენტთა 69% უჭერს, მარტში დაფიქსირებული 77%-ის სანაცვლოდ.

მიმდინარე სამხედრო კონფლიქტი უარყოფითად აისახება ტრამპის პოლიტიკურ რეიტინგზეც. ზედიზედ მეორე გამოკითხვაში, პრეზიდენტის საქმიანობას რესპონდენტთა მხოლოდ 33% იწონებს, რაც ყველაზე დაბალი მაჩვენებელია ტრამპის როგორც პირველი, ისე მეორე საპრეზიდენტო ვადის პერიოდში.

ამასთან, Reuters/Ipsos-ის კვლევის თანახმად, მოსახლეობის 83%-ს მიაჩნია, რომ ომი „გახანგრძლივდება“, რაც აღემატება თვის დასაწყისში დაფიქსირებულ 80%-იან მაჩვენებელს.

კვლევის ფარგლებში მთელი ქვეყნის მასშტაბით 1 215 ამერიკელი სრულწლოვანი გამოიკითხა, ხოლო ცდომილების ზღვარი 3 პროცენტულ პუნქტს შეადგენს.