რუსეთის საგარეო საქმეთა მინისტრის მოადგილე: რუსეთი მზადაა განიხილოს ახალი წინადადებები უკრაინის კონფლიქტის დარეგულირებასთან დაკავშირებით, თუმცა ნებისმიერი ინიციატივა „ადგილზე არსებულ რეალობას“ უნდა ემყარებოდეს

რუსეთი მზადაა განიხილოს ახალი წინადადებები უკრაინის კონფლიქტის დარეგულირებასთან დაკავშირებით, თუმცა ნებისმიერი ინიციატივა „ადგილზე არსებულ რეალობას“ უნდა ემყარებოდეს. ამის შესახებ რუსეთის მაღალი რანგის დიპლომატმა განაცხადა.

რუსეთის საგარეო საქმეთა მინისტრის მოადგილემ, სერგეი რიაბკოვმა აღნიშნა, რომ ვაშინგტონმა „კონსტრუქციული დიალოგის“ მზაობა აჩვენა. „ამ ეტაპზე საკვანძოა, რამდენად შესწევს უნარი ვაშინგტონს, გავლენა მოახდინოს კიევის რეჟიმსა და მის ევროპელ პარტნიორებზე, რომლებიც კვლავინდებურად რუსეთის სტრატეგიულ დამარცხებაზე ოცნებობენ“, - განაცხადა რიაბკოვმა.

ირანში მიმდინარე ომის ფონზე, რუსეთსა და აშშ-ს შორის უკრაინაში საომარი მოქმედებების დასრულებაზე მიმართული მოლაპარაკებები პრაქტიკულად შეჩერებულია.

კრემლის ცნობით, ჯერჯერობით უცნობია, როდის შედგება აშშ-ის პრეზიდენტის სპეციალური წარმომადგენლების, ჯარედ კუშნერისა და სტივ უიტკოფის მორიგი ვიზიტი მოსკოვში, რომლებიც ადრე რუსულ მხარესთან დიალოგს უძღვებოდნენ.

აშშ-ის სახელმწიფო მდივანმა, მარკო რუბიომ გასულ თვეს მანილაში სერგეი ლავროვთან შეხვედრისას ხაზი გაუსვა, რომ ვაშინგტონი ომის დასრულების ხელშეწყობის ერთგული რჩება. თუმცა, მანვე აღნიშნა, რომ საკითხის სწრაფი გადაჭრა მოსალოდნელი არ არის და აშშ „ურთიერთმისაღები პოზიციის“ გამოკვეთას ცდილობს.

რიაბკოვის თქმით, მოსკოვი მზადაა რუბიოს ახალ ინიციატივებს მოუსმინოს და ვაშინგტონთან დიალოგი გააგრძელოს: „რუსეთის ფედერაცია მზად არის განიხილოს ნებისმიერი გონივრული წინადადება, რომელიც რუსეთის პრეზიდენტის მიერ დასახულ მიზნებს შეესაბამება და ადგილზე არსებულ რეალობას ითვალისწინებს“.

თითქმის ოთხნახევარწლიანი ომის შედეგად, რუსეთს უკრაინის საერთაშორისოდ აღიარებული ტერიტორიის დაახლოებით მეხუთედი აქვს ოკუპირებული. მოსკოვი აცხადებს, რომ მოლაპარაკებებისთვის ღიაა, თუმცა პირობად სწორედ „ადგილზე შექმნილი ახალი რეალობის“ აღიარებას აყენებს.