შალვა პაპუაშვილი: ჩვენთვის მნიშვნელოვანია საგზაო უსაფრთხოება და მნიშვნელოვანია, რომ ძირითადი ავტოსაგზაო შემთხვევები იყოს აღმოფხვრილი

მინიმალური დარღვევების შემთხვევაში იყო მაღალი ფინანსური ტვირთი მოქალაქისთვის, ამიტომ ამ ცვლილებით ავირჩიეთ უფრო დიფერენცირებული მიდგომა, სადაც იქნება სამი კლასი დარღვევის და იქნება სიჩქარის გადაჭარბების ადეკვატური სანქცია, - განაცხადა პარლამენტის თავმჯდომარე შალვა პაპუაშვილმა სიჩქარის გადაჭარბებისთვის განსაზღვრული ჯარიმების შემცირებასთან დაკავშირებით.

მისი თქმით, საგზაო უსაფრთხოების მიღწევა მუდმივი პროცესია და კანონში შესული ცვლილებების შემდეგაც გაგრძელდება შედეგებზე დაკვირვება.

„ჩვენთვის მნიშვნელოვანია საგზაო უსაფრთხოება და მნიშვნელოვანია, რომ ძირითადი ავტოსაგზაო შემთხვევები იყოს აღმოფხვრილი, რათა შემცირდეს განსაკუთრებით ლეტალური შემთხვევები. ამიტომ ჩვენ ვცდილობთ სხვადასხვა ინსტრუმენტი გამოვიყენოთ გადაჭარბებული სიჩქარით მოძრაობის საწინააღმდეგოდ. ჯარიმების გაზრდა არის ერთ-ერთი ასეთი მექანიზმი. ჩვენ რადიკალურად გავზარდეთ სანქციები მინიმალურ დარღვევებზეც. შემდეგ შსს დააკვირდა, მოგვცა თუ არა ამან შედეგი. დიდი შედეგი არ მოგვცა. მინიმალური დარღვევების შემთხვევაში იყო მაღალი ფინანსური ტვირთი მოქალაქისთვის, ამიტომ ჩვენ ამ ცვლილებით ავირჩიეთ უფრო დიფერენცირებული მიდგომა, სადაც იქნება სამი კლასი დარღვევის და იქნება სიჩქარის გადაჭარბების ადეკვატური სანქცია. ვნახოთ, ამასაც დავაკვირდებით რა შედეგები იქნება. ეს მუდმივი პროცესია იმისთვის, რომ მივაღწიოთ საგზაო უსაფრთხოებას", - აღნიშნა შალვა პაპუაშვილმა.