შალვა პაპუაშვილი ოპოზიციაზე: ვეუბნებოდით - ნუ უსმენთ გარე დამკვეთებს, მოუსმინეთ ქართველ ხალხს, თქვენს ამომრჩეველს. არ მოუსმინეს - მიიღეს ეს შედეგი

შეიცვლება ის, რომ მოუწევთ 2028 წლის ოქტომბერში მონაწილეობა მიიღონ არჩევნებში და მიღებულ მანდატს სცენ პატივი, იმიტომ რომ მათთვის ამოსავალი ჩვენი კონსტიტუცია კი არ არის, ამოსავალია ის, გარედან რას ეტყვიან, - ასე უპასუხა შალვა პაპუაშვილმა კითხვას იმასთან დაკავშირებით შეიცვლება თუ არა ოპოზიციის ქმედებებში აშშ-ის ახალი ადმინისტრაციის დამოკიდებულების გათვალისწინებით.

პარლამენტის თავმჯდომარემ აღნიშნა, რომ 2024 წლის არჩევნების შემდეგ ოპოზიციის ნაწილს მანდატებზე უარის თქმა აშშ-ის წინა ადმინისტრაციამ და ბრიუსელმა მიუთითეს.

„ამ ეტაპზე შეუძლიათ ისხდნენ სახლში და იზრუნონ 2028 წელზე. სხვა რა უნდა ქნან? მათ ჰქონდათ შესაძლებლობა ყოფილიყვნენ დემოკრატიული პროცესის ნაწილი. როგორც ჩანს, ამ შეხვედრაზე დემოკრატიისა და სამართლებრივი სახელმწიფოს ანა-ბანა აუხსნეს, რომ მანდატი, რომელსაც იღებ, უნდა გამოიყენო დემოკრატიულ ინსტიტუტებში შენი ამომრჩევლის ხმის გასაჟღერებლად. თავის დროზე ამერიკის შეერთებული შტატების წინა ადმინისტრაციამ მიუთითა, ბრიუსელმა მიუთითა და ამიტომ დატოვეს მანდატები, ასე რომ ეს სრულად მათი ბრალია. საკუთარი ქცევით ჩაიყენეს თავი ამ მდგომარეობაში.

ამ ცეცხლს კიდევ ნავთი დაასხეს იმით, რომ გადაწყვიტეს, რომ შეეძლოთ ძალადობით ხელისუფლების შეცვლა, მოაწყვეს 4 ოქტომბრის დამხობის მცდელობა და ახლა მათ ზოგიერთი ლიდერი ამ დანაშაულისთვის სასჯელს იხდის. ვინმე თუ რამე დასკვნას გამოიტანს, ეს ჩვენი საზრუნავი არ არის. პირიქით, ჩვენ რასაც ვამბობდით, ზუსტად ის ახდა ერთი-ერთში. ვეუბნებოდით - ნუ უსმენთ გარე დამკვეთებს, მოუსმინეთ ქართველ ხალხს, თქვენს ამომრჩეველს. არ მოუსმინეს - მიიღეს ეს შედეგი“, - განაცხადა პაპუაშვილმა.