შალვა პაპუაშვილი PABSEC-ზე: მნიშვნელოვანია, რომ ჩვენი თავმჯდომარეობის პერიოდში ძალიან აქტიური იყო ასამბლეა. მათ შორის მეც, როგორც პრეზიდენტს ასამბლეისა, მომიწია რამდენიმე ღონისძიებაში ასამბლეის სახელით მონაწილეობა
თავმჯდომარე ქვეყნის რანგში საქართველო შავი ზღვის ეკონომიკური თანამშრომლობის ორგანიზაციის საპარლამენტო ასამბლეას მასპინძლობს.
როგორც ჟურნალისტებს საქართველოს პარლამენტის თავმჯდომარე შალვა პაპუაშვილმა განუცხადა, მნიშვნელოვანია, რომ საქართველოს თავმჯდომარეობის პერიოდში ასამბლეა ძალიან აქტიური იყო.
„როგორც იცით, საქართველო გახლავთ ასამბლეის თავმჯდომარე ქვეყანა და თავმჯდომარე ქვეყნის რანგში ვმასპინძლობთ ამ ასამბლეას. დღეს გვქონდა ბიუროს სხდომა. იქნება კომიტეტის სხდომა, რომელსაც ვუძღვებით. მივიღეთ საორგანიზაციო გადაწყვეტილებები ასამბლეასთან დაკავშირებით. ხვალ კი უკვე შედგება თავად ასამბლეა, სადაც შავი ზღვის ეკონომიკური თანამშრომლობის ორგანიზაციის ათი ქვეყანა მიიღებს მონაწილეობას. დელეგაციების ნაწილი უკვე ჩამოსულია და დღეს ჩამოვა ყველა დელეგაცია იმისთვის, რომ ხვალ ვუმასპინძლოთ დიდ საერთაშორისო ღონისძიებას. მნიშვნელოვანია, რომ ჩვენი თავმჯდომარეობის პერიოდში ძალიან აქტიური იყო ასამბლეა. მათ შორის მეც, როგორც პრეზიდენტს ასამბლეისა, მომიწია რამდენიმე ღონისძიებაში ასამბლეის სახელით მონაწილეობა. ვფიქრობ, ამით გარკვეულწილად გავააქტიურეთ, გავამდიდრეთ ასამბლეის მუშაობა. შემდეგ ეტაპზე უკვე საბერძნეთს გადავცემთ ასამბლეის თავმჯდომარეობას“, - აღნიშნა შალვა პაპუაშვილმა.
შალვა პაპუაშვილმა შავი ზღვის ეკონომიკური თანამშრომლობის ორგანიზაციის საპარლამენტო ასამბლეის ბიუროსა და მუდმივმოქმედი კომიტეტის სხდომას უხელმძღვანელა
იმედი
წყარო: imedinews.ge