შალვა პაპუაშვილი „სამართლიანი არჩევნების“ განცხადებაზე: როდესაც სამართლებრივი გზით მიდიხარ, სასამართლოს პროცედურებს უნდა დაემორჩილო. ეს ორგანიზაციები არიან კანონდამრღვევები, პატივს არ სცემენ არც კანონის უზენაესობას, არც დემოკრატიას

პრობლემა იმაშია, რომ როდესაც სამართლებრივი გზით მიდიხარ, სასამართლოს პროცედურებს უნდა დაემორჩილო, რასაც ეს ორგანიზაციები არ აკეთებენ, - განაცხადა პარლამენტის თავმჯდომარე შალვა პაპუაშვილმა. ამ კომენტარით ის გამოეხმაურა „სამართლიანი არჩევნების“ მიერ გავრცელებულ ინფორმაციას, რომ ევროსასამართლომ 5 არასამთავრობო ორგანიზაციის დაყადაღების საქმეზე არსებითი განხილვა დაიწყო.

პაპუაშვილის თქმით, ეს ორგანიზაციები არიან კანონდამრღვევები და კანონის უზენაესობას პატივს არ სცემენ.

„მათ მიმართეს საკონსტიტუციო სასამართლოს, მოითხოვეს კანონის შეჩერება გადაწყვეტილების მიღებამდე, საკონსტიტუციო სასამართლომ უარი უთხრა, მიმართეს სტრასბურგის სასამართლოს და არც სტრასბურგს შეუჩერებია. არც სტრასბურგმა, არც საკონსტიტუციო სასამართლომ კანონის მოქმედება განხილვის პროცესში არ შეაჩერეს, რაც ნიშნავს იმას, რომ მათ უნდა შეასრულონ კანონი. მაგრამ ვხედავთ, რომ ეს ორგანიზაციები დღეს არიან კანონდამრღვევები, პატივს არ სცემენ არც კანონის უზენაესობას, არც დემოკრატიას, არც მართლწესრიგს, რაც კანონმორჩილებაში იგულისხმება. ამიტომ მთავარი დასკვნა ეს უნდა გამოვიტანოთ, საქმე გვაქვს კანონდამრღვევებთან, რომლებიც უცხოური დაფინანსებით არიან ამ კანონდარღვევაში წახალისებულები. ვიცით, რომ ისინი არ რეგისტრირდებიან გამჭვირვალობის რეესტრში და მათი დამფინანსებლები დაფინანსებას კი არ უჩერებენ, ფულს უმატებენ, რითაც ახალისებენ საქართველოში კანონდარღვევას, რაც აღმაშფოთებელი ფაქტია“, - აღნიშნა პაპუაშვილმა.

„სამართლიანი არჩევნების“ ინფორმაციით, ადამიანის უფლებათა ევროპულმა სასამართლომ დაიწყო არსებითი განხილვა ხუთი ქართული სამოქალაქო ორგანიზაციის საბანკო ანგარიშების დაყადაღების საქმეზე.