შალვა პაპუაშვილი: ზელენსკის ინიციატივა, რომ ასე დემონსტრაციულად შეხვედროდა ადამიანს, რომელიც თავად შეიყვანა სანქცირებულთა სიაში, აჩვენებს იმას, რომ მან შესაძლოა გადაიაზრა მისი პოლიტიკის მცდარი მიმართულება

მაშინ როდესაც საქართველოს ხელისუფლება ათობით ათას ლტოლვილს იღებდა, როდესაც ასობით უკრაინელ ბავშვს უკრაინულ ენაზე სკოლებში კლასებს უქმნიდა, როდესაც ყველა რეზოლუციაში გვერდზე ედგა, ამის საპასუხოდ, როდესაც ხელისუფლება ასანქცირებს საქართველოს ხელისუფლების წარმომადგენლებს, ამას თუ უკრაინული ხელისუფლებისთვის მადლიერება ჰქვია, მაშინ ტერმინებში ვერ ვთანხმდებით, იმიტომ რომ ქართულად ამას მადლიერების არ გამოხატვა ჰქვია, - განაცხადა საქართველოს პარლამენტის თავმჯდომარე შალვა პაპუაშვილმა, რითაც უპასუხა კითხვას - „არაერთხელ გაგიკრიტიკებიათ პერსონალურად ზელენსკი, ამ კრიტიკის შემდეგ და იმ განცხადებების შემდეგ, რომ უკრაინის ხელისუფლება ომში გვითრევდა, ახლა ეს საფრთხე აღარ არის?“

პაპუაშვილის თქმით, უკრაინის პრეზიდენტმა შესაძლოა გადაიაზრა საკუთარი პოლიტიკის მცდარი მიმართულება, რადგან მათ თავად გამოთქვა სურვილი შეხვედროდა საქართველოს პრემიერ-მინისტრს, რომელიც თავადვე დაასანქცირა.

როდესაც შენი ქვეყნის მხარში მდგომ ხელისუფლების წარმომადგენლებს სანქციებს უწესებს, ეს ყველაფერი გარდა მადლიერების გამოხატვისა. ჩვენი თვალით ვნახეთ და მოვისმინეთ, როდესაც პრეზიდენტმა ზელენსკიმ მოითხოვა, რომ საქართველოს ხელისუფლებას მებრძოლები დაეორგანიზებინა, უკრაინაში საომრად გაეშვა და ამით ღიად ჩართულიყო როგორც მხარე რუსეთ-უკრაინის ომში. ამას ქართულად ომში ჩათრევა ჰქვია, უკრაინულად რას ეძახიან არ ვიცი.

ის ინიციატივა, რომ ასე დემონსტრაციულად შეხვედროდა ადამიანს, რომელიც თავად შეიყვანა სანქცირებულთა სიაში, აჩვენებს იმას, რომ მან შესაძლოა გადაიაზრა მისი პოლიტიკის მცდარი მიმართულება და ეს თუ ასეა, მე მხოლოდ მივესალმები. გამოცდილებამ გვაჩვენა, რომ როდესაც ხარ მართალი, საბოლოო ჯამში ყველას უწევს ამ სიმართლის აღიარება.

4 წელია ვაკვირდებით საქართველოზე თავდასხმებს, სააკაშვილთან დაკავშირებით ცილისწამებებს, მათ შორის პრეზიდენტ ზელენსკის მხრიდან, თითქოს სააკაშვილს ვინმე კლავს. აღარაფერს ვამბობ იმაზე, რომ თავად სააკაშვილი უკრაინის დაზვერვის სამსახურმა შემოაგზავნა საქართველოში. ის რომ ზურაბ ადეიშვილი სულ ახლახან უკრაინის ინტერპოლის ხელმძღვანელად დაინიშნა - მთელი ქვეყანა გაკვირვებით შევყურებდით უკრაინის ხელისუფლების ქმედებებს. ერთადერთი რაც „განსაბლოკი“ იყო, ეს არის თავად უკრაინის ხელისუფლების დამოკიდებულება ქართველი ხალხის მიმართ და იმედი მაქვს, რომ ეს მოხდება“, - განაცხადა პაპუაშვილმა.