თეა წულუკიანი გოტა ჭანტურიას: თქვენ დღეს ებრძვით ამ ხელისუფლებას იმიტომ, რომ დღეს „ქართულმა ოცნებამ“ შეძლო და საქართველოში დაამკვიდრა ის დემოკრატია, სადაც თქვენ ბრძოლის საშუალება გაქვთ. წინა ხელისუფლების დროს თქვენ არ და ვერ იბრძოდით, ბუჩქის ძირში იყავით, ეს თქვენ უნდა თქვათ

მე თქვენ გეტყვით, რომ სიცრუეა ის, რომ თქვენ ვინმეს როდისმე ებრძოდით, თქვენ დღეს ებრძვით ამ ხელისუფლებას იმიტომ, რომ დღეს „ქართულმა ოცნებამ“ შეძლო და საქართველოში დაამკვიდრა ის დემოკრატია, სადაც თქვენ ბრძოლის საშუალება გაქვთ. წინა ხელისუფლების დროს თქვენ არ და ვერ იბრძოდით. რომელი ბუჩქის ძირში იყავით, ეს თქვენ უნდა თქვათ, - ასე უპასუხა გადაცემაში „ღია ეთერი“ პარლამენტის თავმჯდომარის მოადგილემ, თეა წულუკიანმა მოძრაობა სოციალური დემოკრატიისთვის წარმომადგენლის, გოტა ჭანტურიას, რომელმაც მანამდე განაცხადა, რომ „სისხლიან „ნაციონალურ მოძრაობას“ ებრძოდა“.

თეა წულუკიანმა გოტა ჭანტურიას ასევე უთხრა, რომ ოპონენტად ვერ აღიქვამს, რადგან ის არის „ნაციონალური მოძრაობის“ ხელში ბრმა იარაღი.

„თქვენ წარმოდგენა არ გაქვთ სად ხართ, რას საუბრობთ და მინდა მითხრათ, როდესაც ახსენებთ ირინა ენუქიძეს და სანდრო გირგვლიანს, მაშინ, როდესაც ამ ქალბატონს არაადამიანურად უჭირდა და მთელს სისტემას ერთი ქალი ებრძოდა, თქვენ მის დასახმარებლად რა გააკეთეთ? თქვენ და ის სამოქალაქო მოძრაობა ვერასდროს ვერ შეცვლის „ქართულ ოცნებას“ სწორედ იმ სისუსტის გამო, რომელიც თქვენ წარმოაჩინეთ", - განაცხადა წულუკიანმა.

მან უკრაინაში ომის დაწყების პერიოდში საქართველოსთვის წაყენებული მოთხოვნების შესახებაც ისაუბრა.

„უნდა მოისმინოთ და დაიჯეროთ ფაქტები, როდესაც თქვენ დაიჯერებთ რეალობას, მერე ჩვენთან ბრძოლა გაგიადვილდებათ. დიახ, როდესაც უკრაინაში ომი დაიწყო, იყო მოთხოვნა მეორე ფრონტის გახსნისა. როდესაც ამაზე მაშინდელი მთავრობის პრემიერ-მინისტრის ირაკლი ღარიბაშვილის და მაშინდელი პარლამენტის ლიდერების მხრიდან უარი მიიღეს, არ მოისვენეს და ბიძინა ივანიშვილს შეხვდნენ, რაზეც მოიტყუეს, რომ არ ყოფილან. ბიძინა ივანიშვილს მოსთხოვეს ქართველი ერის გაწირვა და ომში ჩართვა და სწორედ ამაზე უპასუხა მან ძალიან მკაცრად, რომ ეს ვერ მოხდებოდა“, - აღნიშნა თეა წულუკიანმა.

პარლამენტის თავმჯდომარის მოადგილის თქმით, ბიძინა ივანიშვილის უარის შემდეგ ის გახდა მთავარი მტერი იმ ძალების, რომელიც ჩაირთო მის წინააღმდეგ იმიტომ, რომ მან არ გაწირა ქართველი ერი.

„კაცი, რომელიც არის „ნაციონალური მოძრაობის“ ხელში ბრმა იარაღი, გარედან დაფინანსებული, თვითონაც ვერ გაუგია რა უნდა, ამბობს რაღაც გაუაზრებელ ფრაზებს და ჰგონია, რომ რაღაცა ტიპის თანამედროვე ფსევდო ჩე გევარა შეცვლის „ქართულ ოცნებას“. თქვენნაირები „ქართულ ოცნებას“ ვერ შეცვლიან და მიტომ გვაქვს მე და ბატონ ლევანს რაღაც ტიპის სასჯელი, რომ ისევ ვართ ხელისუფლებაში.

როდესაც თქვენ აღიარებთ, რომ ბიძინა ივანიშვილმა ერი არ გაწირა, „ქართულმა ოცნებამ“ მშვიდობა შეინარჩუნა ამ ქვეყანაში, უკვე გახდებით კომპეტენტური მოწინააღმდეგე და შეიძლება ცოტა ხანში საშიშიც, მაგრამ ეს უნდა აღიაროთ ჯერ“, - უპასუხა წულუკიანმა.