თენგიზ შარმანაშვილი მარტა კოსის განცხადებაზე: რა თქმა უნდა, ეს ძალიან დამაზიანებელი იქნება საქართველოსთვის და ყველა იმ ქვეყნისთვის, ვინც ახლა აპირებს შესვლას ან აქვს პრეტენზია შევიდეს ევროკავშირში

რა თქმა უნდა, ეს ძალიან დამაზიანებელი იქნება საქართველოსთვის და ყველა იმ ქვეყნისთვის, ვინც ახლა აპირებს შესვლას ან აქვს პრეტენზია შევიდეს ევროკავშირში, - ასე გამოეხმაურა გადაცემაში „დღის ქრონიკა“ თავდაცვისა და უშიშროების საპარლამენტო კომიტეტის თავმჯდომარის პირველი მოადგილე თენგიზ შარმანაშვილი გაფართოების საკითხებში ევროკომისარ მარტა კოსის განცხადებას, რომ ევროკავშირის ახალი წევრებისთვის ვეტოს უფლება შეიზღუდება.

შარმანაშვილის თქმით, ალოგიკურია დაყო ქვეყნები ახლად მისაღებ ქვეყნებად, რაც აბსოლუტურ გაკვირვებას იწვევს.

„რა თქმა უნდა, ეს ძალიან დამაზიანებელი იქნება საქართველოსთვის და ყველა იმ ქვეყნისთვის, ვინც ახლა აპირებს შესვლას ან აქვს პრეტენზია შევიდეს ევროკავშირში, აქვს კანდიდატი ქვეყნის სტატუსი. იმთავითვე განსაზღვრული იყო რა ტიპის გაერთიანებაში შევდიოდით, რა უფლებამოსილებები უნდა გვქონოდა, რა ვალდებულებები უნდა გვქონოდა და ამის ერთობლივი ჯამით მივიღეთ ეს გადაწყვეტილება. სწორიც იყო, რომ ასე მივიღეთ. ამ დროს, ბოლოსკენ გვიცვლიან თამაშის წესებს. ეს მართლაც სეგრეგაციაა, ახალი ტიპის ურთიერთობებია, ევროსეგრეგაციაა. რანაირად მივიდნენ ამ დასკვნებამდე, ჩვენთვის სრულიად წარმოუდგენელია“, - აღნიშნა მან.